.png)
Gazeta Si - Drejtori i pezulluar nga detyra i Departamentit për Teknologjinë dhe Informacionin në Policinë e Shtetit, Ervin Muça ka mohuar akuzat ndaj tij për ndërhyrje në sistemin TIMS. Megjithatë, Gjykata e Tiranës vendosi ta lërë në fuqi masën e sigurisë "arrest shtëpie".
Në seancë avokati i tij kërkoi që hetimi të vijonte në gjendje të lirë, kërkesë që u rrëzua nga trupa e gjyqtarëve.
Teksa është paraqitur në ambientet e gjykatës, Muça e konsideron veten të pafajshëm, duke theksuar se bëhet fjalë për spekulime mediatike.
LEXO EDHE:
- Noka: Arrestimi i Ervin Muçës u bë për të shpëtuar Taulant Ballën, çështja duhet t’i kalojë SPAK-ut
- Vjedhja e TIMS, Prokuroria e Tiranës lejoi SPAK të bëjë ekspertizën për të mos dekonspiruar hetimet
“E gjitha kjo është një spekulim mediatik, gjykata do ta vërtetojë këtë, deklarohem i pafajshëm. Kam bërë thjesht detyrën. Nuk ka lidhje kodi i punonjëses. Janë të gjitha të bëra sipas procedurës”, - u shpreh Muça.
Më 9 prill, Prokuroria e Tiranës ka kërkuar “arrest shtëpie” dhe pezullimin nga detyra për Ervin Muçën.
Në një njoftim për mediat, prokuroria tha se Muça akuzohet se ka eksportuar bazën e të dhënave të sistemit TIMS në Policinë e Shtetit. Ndaj tij është ngritur akuza “Hyrje e paautorizuar kompjuterike”.
Muça akuzohet nga prokuroria se më 2 gusht të vitit të shkuar ka ndërhyrë në mënyrë të paautorizuar në bazën e të dhënave që ndodhet në godinën e Drejtorisë së Teknologjisë dhe Informacionit në orët e vona të natës, duke përdorur kodin PIN personal të një punonjësi tjetër jo prezent.
Pikërisht gjatë këtyre verifikimeve, Prokuroria e Tiranës thotë se zbuloi se Muça në 2007, “në Itali është raportuar si përgjegjës për veprat penale të dokumenteve false kryer nga persona privatë dhe përdorimin e një akti të rremë”.
Po ashtu, ai rezulton se përveç detyrës si Drejtor IT, punonte edhe si këshilltar i jashtëm i Drejtores së Agjencisë Shtetërore të Kadastrës, në kundërshtim me ligjin për Policinë e Shtetit.
Nga veprimet procedurale të kryera nën drejtimin e Prokurorisë, rezulton se ka dyshime të arsyeshme, se në bazën e të dhënave të Policisë së Shtetit është ndërhyrë në mënyrë të paautorizuar nga Drejtori i Departamentit të Teknologjisë Informacionit dhe shtetas të tjerë.
Kërkesa e prokurorisë u pranua nga Gjykata e Tiranës dhe vendimi i arrestit në shtëpi ndaj Muçës u ekzekutua nga Agjencia e Mbikëqyrjes Policore.
Po gjatë orëve të mbrëmjes, me urdhër të Drejtorit të Përgjithshëm të Policisë së Shtetit, Muhamet Rrumbullaku ai u pezullua menjëherë nga detyra.
Ndërhyrjet në TIMS shqetësuan dhe ambasadën e SHBA, ku i ngarkuari me punë McDowell gjatë një takimi në gusht me ministrin Balla kërkoi hetim të shpejtë dhe të gjithanshëm të çështjes.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
