.png)
Liberty Media nuk dëshiron të heqë dorë nga plani i saj për të organizuar 23 gara këtë sezon të Formula 1. Orët e fundit qarkullon lajmi se garat e Kanadasë dhe Brazilit, respektivisht më 13 qershor dhe 7 nëntor, janë në dilemë për shkak të pandemisë Covid-19. Në Kanada është ende në fuqi ligji, që çdo i huaj duhet të qëndrojë 2 javë në karantinë, ashtu sikurse në Australi, çka solli shtyrjen e kësaj gare për në nëntor. Për pasojë, gara e Kanadasë mund të zëvendësohet me garën e Turqisë, me pistën e Stambollit.
Ndërsa në Brazil situata nuk është aspak e mirë prej pandemisë, me mijëra të infektuar çdo ditë. Kjo garë, në rast se situata deri në nëntor nuk përmirësohet, mund të zëvendësohet me garën e Gjermanisë (pista e Nurburgring ose Hockenheim).
Pra, “plani B” duket se do të vihet shumë shpejt në veprim nga Formula 1. Duket qartë se vështirësitë më të mëdha janë udhëtimet e largëta, ato jashtë Europës. Ndaj, disa pista në Europë po lajmërohen për të qenë gati në rast nevoje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
