.png)
Ndryshimi i sistemit dhe reforma zgjedhore, situata politike kanë qenë pjesë e diskutimeve në tryezën e aleatëve të opozitës në selinë e PD-së mbrëmjen e së mërkurës. Opozita ka kërkuar hartimin e menjëhershëm të paketës së reformës zgjedhore, duke kërkuar që ajo të miratohet sa më parë. Paketës së opozitës mësohet se iu është dhënë dora e fundit e ndryshimeve dhe së shpejti platforma do të jetë objekt i prezantimit në tureve në Shqipëri. Mësohet se përpara se të paraqitet te ndërkombëtarë, paketa e opozitës jashtë parlamentare do të ketë prezantohet në takime me qytetarët. Këtë e bën të ditur, eksperti i Çështjeve Zgjedhore në PD, Ivi Kaso për Gazeta “Si”. Sa i përket ndryshimit të sistemit zgjedhor, duket se PD-ja e ka lënë për një fazë të dytë dhe për këtë çështje po bind edhe aleatët e saj. Vetë Basha në një prononcim për mediat theksoi se është i hapur për të diskutuar me qytetarët shqiptarë se cilin sistem zgjedhor duan për zgjedhjet, por se theksoi se më parë duhej garancia për procesin zgjedhor.
“Nisur nga praktika e 7 viteve të fundit, mund të themi me siguri të plotë se cilido sistem të zgjidhet, do të dështojë, nëse nuk garantojmë ndarjen e politikës nga krimi, ndaljen e blerjes së votës me paratë e pista dhe ndëshkimin e krimeve elektorale nga një drejtësi e pavarur. Ndaj, nga kjo pikëpamje, mund të them se alibia, se “fajin e ka sistemi”, fatkeqësisht mund të kthehet në një shtojcë të propagandës së Ramës, sipas të cilës jemi të gjithë njësoj, sipas të cilës fajin e ka çdokush, përveç atij, për kandidimin e personave me rekorde kriminale, për kapjen e gjithë kupolës së shtetit dhe policisë duke blerë vota me krimin e organizuar”, theksoi Basha.
Ndërsa edhe aleatët e PD-së duke parë këtë qëndrim të Bashës, por edhe të Kryemadhit të LSI-së janë tërhequr nga kushti i tyre për ndryshimin e sistemit, duke e lidhur këtë edhe me faktin e nevojës që çuarjes së vendit në zgjedhje të parakohshme. “Është koha për t’i dalë përballë kësaj qeverie e për të pretenduar me çdo kusht zgjedhje të parakohshme. Për hir të kësaj pune po sakrifikohet një sistem, i cili për mua nuk është funksional. Prej vitesh kam pretenduar që duhet ndryshuar. Në shkëmbim të kësaj pranojmë edhe me këtë sistem”, do të shprehet kreu i LZHK-së, Dashamir Shehi.
Të njëjtin qëndrim duket se ndaj edhe kreu i Partisë Agrare që thekson se mos ndryshimi i sistemit mund të lidhjet me kohën e shkurtër që mund të ketë në dispozicion në rast se shkohet në zgjedhjet e parakohshme. Ndërkaq aleatët duket se është tërhequr nga kushti që në zgjedhje të shkohet pa Ramën si kryeministër.
Opozita ndërkaq pas hartimit të paketës së reformës zgjedhore po përgatitet të zhvillojë takime në rrethe për situatën politike, duke pasur në konsideratë dhe paraqitjen e platformës për zgjidhen e krizës politike dhe ekonomike. Mënyra se si po vepron qeveria për menaxhimin e situatës të post tërmetit tragjik të 26 nëntorit po ndiqet nga opozita, e cila pritet të ketë edhe si kauzë politike ndaj qeverisë Rama.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
