.png)
Gazeta Si – Java e 29-të e Superiores është mbyllur me ndeshjen Tirana-Egnatia, që u luajt në stadiumin ‘Elbasan Arena’. Kampionët në fuqi fituan 2-1, duke u shkëputur kështu 5 pikë nga Partizani i vendit të dytë.
Skuadra e Orges Shehit u gjend në disavantazh në pjesën e parë, pas golit të realizuar nga Kasa për Egnatian. Për përmbysjen e Tiranës mendoi Kristal Abazaj, i cili sot ka shënuar 2 golat e parë me fanellën bardheblu.
Sulmuesi anësor barazoi me një veprim individual që në pjesën e parë, me një goditje në pozicion diagonal me portën. Në pjesën e dytë ai shënoi edhe golin e dytë me portën bosh, pas një kundërsulmi të shpejtë të Tiranës dhe pasimit të Lushkjes. Pas golave Abazaj la fushën për shkak dëmtimi.
Tirana e mbrojti rezultatin deri në fund dhe pastaj festoi fitoren dhe shkëputjen nga rivalët e Partizanit. Me 5 pikë diferencë bardheblutë kanë komoditetin ta administrojnë më mirë pjesën e fundit të kampionatit.
Ndeshjen e ndoqi nga afër edhe trajneri i Kombëtares, Silvinjo, bashkë me ndihmësin Doriva dhe Ervin Bulkun. Braziliani i ndjek vazhdimisht ndeshjet e kampionatit shqiptar dhe sot kishte zgjedhur përballjen e Tiranës me Egnatian.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
