Gazeta Si - Gjykata e Apelit të Juridiksionit të Përgjithshëm, ka lënë në fuqi vendimin e Gjykatës së Elbasanit, e cila shpall fajtor dhe dënon me burg dy të pandehurit, që tentuan të vrisnin 6 vite më parë biznesmenin Fuad Verzivolli, duke i vendosur tritol në makinë.
Kështu, është lënë në fuqi vendimi me burg për Astrit Sinanajn, i akuzuar për disa vepra penale dhe Thanas Thoman, i akuzuar për moskallëzim të krimit.
Sinanaj u dënua më 8 korrik 2020 për vendosjen e tritolit poshtë mjetit tip “Volksëagen” të biznesmenit Fuad Verzivolli.
Ngjarja ndodhi në lagjen ”Luigj Gurakuqi”, pranë Teatrit Skampa Elbasan. Sakaq policia mundi të çaktivizonte pakon e dyshimtë që përmbante brenda një kg tritol C4, që do të hidhej në erë në mënyrë të telekomanduar.
Kamerat e sigurisë të bizneseve përreth tregonin se një person që vendos sasinë e tritolit dhe më pas largohet me një automjet “Fiat”.
Sipas targës së mjetit, u thirr për t’u marrë në pyetje Thanas Thoma, i cili rezultoi të ishte pronari.
Gjatë dëshmisë, Thoma deklaroi se në atë datë, ka kaluar me makinë në qendër të Elbasanit, ku ishte takuar me të njohurin e tij Astrit Sinanaj. I pyetur për rrethanat në të cilat e ka njohur, ai thotë se nëpërmjet një shokut të tij Martin Arapi.
Për këtë ngjarje u mor në pyetje dhe Astrit Sinanaj, i cili ka pohuar se nuk kishte njohje me biznesmenin Fuad Verzivolli dhe se ishte rastësisht në vendin e ngjarjes.
Megjithatë, Sinanaj nuk u dorëzua dhe disa ditë më vonë organizoi një tjetër atentat.
Këtë herë vendosi një sasi tritoli në derën e lokalit të biznesmenit Fuad Verzivolli me emrin “Club Havana” në Elbasan. Edhe këtë herë, shënjestra nuk u prek, por Sinanaj nuk u shpëtoi prangave.
Gjykata e Rrethit Gjyqësor Elbasan vendosi dënimin e Sinanajt me 25 vite burg për kryerjen e veprës penale “Vrasje me dashje e kryer në mënyrë të rrezikshme për jetën e shumë personave” e mbetur në tentativë, “Mbajtja pa leje dhe prodhimi i armëve, armëve shpërthyese dhe i municionit”,“Shkatërrim prone me eksploziv” dhe “Largimi i të burgosurit nga vendi i qëndrimit”.
I dënuar me 10 muaj burg ishte edhe bashkëpunëtori i tij, Thanas Thoma, i cili asokohe akuzohej për “Moskallëzim i krimit”.
Pas vendimit, Sinanaj paraqiti ankim përmes të cilit kërkonte prishjen e vendimit dhe deklarimin e pafajshëm ose në alternativë të deklarimin fajtor të pandehurit me kohën e paraburgimit për veprën penale të “Largimit nga vendi i qëndrimit”.
Gjithashtu ankim bëri edhe Thoma, duke kërkuar ndryshim e vendimit, deklarimin të pafajshëm dhe kthimin e akteve gjykatës së shkallës së parë.
Gjykata e Apelit Durrës vendosi më 27 janar 2021 prishjen e vendimit të Gjykatës së Rrethit Gjyqësor Elbasan dhe kthimin e akteve për rigjykim në po atë gjykatë me tjetër trup gjykues.
Viktima e sulmit të Astrit Sinanaj, biznesmeni Verzivolli ishte kundër vendimit të Gjykatës së Apelit Durrës.
Ai ushtroi rekurs përmes së cilit kërkoi prishjen e vendimit të Gjykatës së Apelit Durrës dhe lënien në fuqi të vendimit të 8 korrikut 2020 të Gjykatës së Rrethit Gjyqësor Elbasan, çka iu refuzua nga Kolegji Penal i Gjykatës së Lartë.
Në përfundim të rigjykimit, Gjykata e Rrethit Gjyqësor Elbasan vendosi më 11 nëntor 2022 deklarimin fajtor të të pandehuri Sinanaj, për kryerjen e veprës penale “Vrasje me dashje e kryer në mënyrë të rrezikshme për jetën e shumë personave”, e mbetur në tentativë dhe dënimin e tij, në bazë të kësaj dispozite, me 20 vjet burgim.
Çështja u apelua dhe gjykua sërish nga Gjykata e Apelit të Juridiksionit të Përgjithshëm mbi bazën e ankimit të bërë nga i pandehuri, i cili kërkoi ndryshimin e vendimit të Gjykatës së Rrethit Gjyqësor Elbasan dhe pushimin e gjykimit për kryerjen e veprave penale të parashikuara, duke e deklaruar fajtor vetëm për kryerjen e veprës penale “Largimi i të burgosurit nga vendi i qëndrimit” dhe në alternativë, prishjen e vendimit objekt shqyrtimi dhe kthimin për rigjykim të çështjes në shkallë të parë me tjetër trup gjykues.
Në përfundim të gjykimit, këtë të hënë, 24 prill 2023, Gjykata e Apelit të Juridiksionit të Përgjithshëm, e përbërë nga trupi gjykues me Relator Gjyqtar Sokol Pina dhe anëtarë Valbona Vata e Valbon Cekrezi, vendosi lënien në fuqi të vendimit të 11 nëntor 2022 të Gjykatës së Rrethit Gjyqësor Elbasan, 20 vite burg për Astrit Sinanaj.
Astrit Sinanaj njihet edhe si kushëriri i Julian Sinanajt, gjithashtu i dënuar me 30 vite burg për vrasje dhe tentativë vrasjeje. Ai u kthye në bashëpunëtor të drejtësisë, duke i shpëtuar dënimit me burg përjetë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.