.png)
Një fabrikë e përpunimit të drurit dhe prodhimit të paletave është përfshirë nga flakët në ne fshatin Ura e Gjollës në Fushë Krujë. Zjarri ka djegur me dhjetëra metër kub dërrasa e materiale drusore.
Burime për Gazetën ‘’SI’’ bëjnë me dije se zjarri ka rënë në fabrikën e përpunimit të drurit, në pronësi të Afrim Çela dhe një personi nga Tirana emri i te cilit nuk bëhet ende i ditur. Për shuarjen e flakëve janë angazhuar zjarrfikësja e Krujës, ajo e Niklës, zjarrfikësja e Kamzës dhe ajo e Vorës. Nuk raportohet për persona të dëmtuar, por dëmi material është i madh.
Banorët që jetojnë pranë fabrikës janë alarmuar dhe kanë lënë banesat. Ata ndihen të frikësuar pasi është hera e dytë që kjo fabrikë përfshihet nga flakët.
“Kemi dalë të traumatizuar, pasi flakët e zjarrit ishin në dritaren e shtëpisë, mezi kemi dale nga banesa. Nuk e kuptoj sesi shteti lejon që të na rrezikohet jeta në këtë mënyrë nga ky person i cili nuk do t’ia dijë për jetën tonë. Fabrika nuk ka sistem anti- zjarr dhe nuk respekton asnjë rregullore, dhe pse është hera e dytë që kësaj fabrike i vihet zjarri, asnjë masë nuk është marrë nga ana e strukturave te shtetit apo nga vetë pronari për ti paraprirë fatkeqësive si kjo e sotmja që desh na dogji brenda familjarisht”, shprehet Qemal Zylfo, i cili ka shtëpinë ngjitur me fabrikën.
Sipas ekspertëve zjarrfikës, zjarri është i qëllimshëm, pasi është vënë në 4 pika të ndryshme. Në vendngjarje ka ardhur dhe prefekti i qarkut Durrës si dhe efektive policie, të cilët kanë shoqëruar pronarin e fabrikës, i cili do merret në pyetje nëse ka konflikte me njeri apo dyshime se kush mund të jetë autori i këtij zjarri të qëllimshëm.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
