Pas deklaratës së drejtoreshës së Zyrës Arsimore të Fierit, Yllka Beci, për nxënësen me shenja helmimi se është shtatzënë, ka reaguar Konfederata e Sindikatave të Shqipërisë.
Nëpërmjet një njoftimi për mediat, Konfederata e Sindikatave të Shqipërisë i kërkon qeverise shkarkimin e menjëhershëm të drejtoreshës Yllka Beci.
“Konfederata e Sindikatave të Shqipërisë i kërkon qeverisë shkarkimin e menjëhershëm të drejtoreshës së ZA Fier Yllka Beci. Vajza 16-vjeçare që është përmendur nga drejtoresha e arsimit të merret nën kujdesin e punonjësve sociale. Media të shmangë publikimin e emrit dhe pamjeve të saj. Ky është një rast i rëndë bullizmi dhe ndëshkimi duhet të jetë edhe ligjor për drejtoreshën e Zyrës Arsimore”, thuhet në njoftim.
Ndër të tjera, Konfederata e Sindikatave të Shqipërisë sjell në vëmendje edhe një tjetër skandal të ndodhur në shkollën e muzikës në Fier.
“Pak ditë më parë në shkollat e Fierit u denoncua një skandal seksual në shkollën e muzikës dhe KSSH sinjalizoi se ishte vetëm maja e ajsbergut. Akuzën tonë e konfirmoi vete drejtoresha e Zyrës Arsimore Fier”, vijon më tej deklarata.
Ditën e mërkurë 60 nxënës të shkollës së mesme “Janaq Kilica” përfunduan të helmuar nga spraj piperi, një rast i përsëritur në harkun kohor të një jave.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.