.png)
Rreth 32 mijë maturantë po zhvillojnë testin e matematikës, por shumë pak minuta pasi ka filluar provimi, tezat janë shpërndarë në rrjetet sociale.
Duket që dalja e tezave gjatë provimit të maturës është bërë një modë tashme. E njëjta gjë ndodhi me provimin e Gjuhë-Letërsisë disa ditë më parë. Gjithashtu edhe gjatë viteve të kaluara ka ndodhur e njëjta histori.
Teza është fotografuar nga nxënësit dhe është postuar në rrjetet sociale në orën 10:45 ndërkohë që provimi ka filluar në orën 10:00. Mesa duket edhe këtë herë ka dështuar kontrolli për sigurinë e provimit.
Kur dolën tezat e provimit të Gjuhë-Letërsisë, Ministria e Arsimit, Sportit dhe Rinisë (MASR) deklaroi se çdo rast tjetër i ngjashëm me të, që orkestrohet qëllimisht nga individë të ngarkuar politikisht do të çohen para drejtësisë në mënyrë që të mos cënohet procesi i Maturës Shtetërore.
“MASR do të kallëzojë penalisht shtetasin, i cili ka publikuar testin e Maturës Shtetërore të Gjuhës shqipe dhe Letërsisë të datës 7.6.2021 në rrjetet sociale gjatë kohës kur provimi ishte ende duke u zhvilluar, si dhe të gjithë pjesëmarrësit në procesin e Maturës Shtetërore të cilët kanë shkelur rregullat duke fotografuar dhe dërguar jashtë qendrave të provimit këtë test, gjatë kohës që ishte duke u zhvilluar,” shkruante më tej Ministria.
Dhe Ministria e Arsimit duket se do ta bëjë sot të njëjtën deklaratë. Dhe e ka gati nga 7 qershori. Vetëm do të ndryshoje emrin e provimit nga Gjuhë-Letërsi në Matematikë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
