.png)
Dua Lipa ka marrë nënshtetësinë shqiptare nga presidenti Bajram Begaj për rolin e saj në përhapjen e famës së shqiptarëve përmes muzikës së saj.
Këngëtarja 27-vjeçare ka lindur në Londër në vitin 1995 nga prindër kosovaro-shqiptarë që ikën nga konflikti në Ballkan.
Ajo shpesh herë e ka përmendur me krenari origjinën e saj shqiptare në Instagram dhe në intervista për shtyp. Ajo gjithashtu shijon udhëtimet familjare në vend dhe merr pjesë në tradita të tilla si mbajtja e një gote në kokë ndërsa kërcen.
“Edhe unë do të jem shqiptare me letra”, tha Dua para se të bënte betimin në bashkinë e Tiranës.
Dua përfundoi turneun e saj vjetor të koncerteve në sheshin Skënderbej të hënën për të përkujtuar Ditën e Pavarësisë.
Vetëm 27 vjeç, këngëtarja është një nga yjet më të mëdhenj të popit britanik, duke realizuar një ëndërr që filloi kur ajo ishte një nxënëse e shkollës fillore në Camden.
E lindur në Londër, Dua ndoqi një shkollë fillore shtetërore dhe shijoi për herë të parë performancën ndërsa bënte një kurs në shkollën e famshme Sylvia Young Theatre.
Pasi kaloi disa vite në Prishtinë pasi puna e babait të saj si menaxher marketingu i ktheu ata në vendlindjen e tij në Kosovë, Dua vendosi me guxim të kthehej e vetme në Britaninë e Madhe në moshën 14 vjeçare në ndjekje të ëndrrës së saj.
Në vitin 2014, ajo nënshkroi me Warner Bros. Records.
Tani, vetëm tetë vite më vonë, ajo ka bërë një turne në botë me një album nr.1 ku ka marrë tre çmime Grammy dhe gjashtë çmime Brit.
Dua, e cila thotë se ndihet edhe shqiptare edhe britanike, bashkëthemeloi Fondacionin Sunny Hill me babanë e saj Dukagjin Lipa.
Fondacioni ka dhënë 100,000 euro për bamirësi dhe ka bërë ngjarje kulturore në Kosovë dhe së fundmi edhe në Shqipëri.
Duke folur për Line Of Best Fit, ajo tha: “Ndihem shumë krenare që jam nga të dyja vendet dhe ndjehem sikur përfaqësoj të dy vendet”.
“Njerëzit kanë filluar të njohin shqiptarët dhe kosovarët më shumë tani dhe për këtë jam krenare. Gjithashtu ndjehem përgjegjëse për imazhin që jap dhe mënyrën se si përfaqësoj vendin tim”.
Në gusht të vitit 2022, Dua u emërua Ambasadore Nderi e Kosovës në një ceremoni në Zyrën e Presidentes në Prishtinë.
Dua është vajza e madhe e Dukagjin Lipës dhe gruas së tij, Anesës, me prejardhje boshnjake dhe kosovare.
Dukagjin, një ish-roker që ndan dashurinë për muzikën njësoj si vajza e tij, është djali i historianit të njohur Seit Lipa, i cili shërbeu si drejtues i Institutit të Historisë së Kosovës.
“Sapo hynë serbët në Kosovë, ata donin që shumë historianë ta rishkruanin historinë e Kosovës”, tha Lipa për Observer në vitin 2018.
"Dhe gjyshi im ishte një nga ata njerëz që nuk do ta bënte, kështu që ai humbi punën e tij, sepse nuk donte të shkruante një histori që nuk ishte e vërtetë".
Seit Lipa vdiq nga një atak në zemër në vitin 1999, vit kur përfundoi Lufta e Kosovës.
Dukagjini do bëhej stomatolog dhe Anesa një avokate para se të largoheshin nga Kosova, por ata hoqën dorë nga profesionet e tyre për të ikur nga vendi në kërkim të një vendi më të sigurt për të krijuar familje.
Ata u vendosën në Hampstead, në veri të Londrës. Pas Duas, erdhi vajza Rina, tashmë 18 vjeçe, modele dhe djali Gjin, 16 vjeç.
Për të fituar para, Dukagjini dhe Anesa punuan në kafene dhe bare si dhe ndoqën shkollën.
"Unë i kam parë prindërit e mi duke punuar çdo ditë të jetës sime. Ndërsa unë shkoja në shkollë, ata po shkonin në shkollë gjithashtu", tha Dua Lipa.
Kur Dua ishte 11 vjeç, Dukagjini mbaroi kursin e tij të biznesit dhe iu ofrua një punë në Prishtinë si menaxher marketingu.
Familja e re u shpërngul në kryeqytetin e Kosovës, ku Dua, e cila fliste shqip, por nuk dinte të lexonte e të shkruante, fillimisht kishte probleme me shkollën e saj.
Pikërisht në Prishtinë, Dua u dashurua vërtet me muzikën.
Ajo filloi të shkruante dhe të regjistronte këngë, por besonte se duhej të kthehej në Londër nëse donte të thyente tregun ndërkombëtar.
Me një pjekuri të jashtëzakonshme, në moshën 14-vjeçare Dua u kthye në Britaninë e Madhe me lejen e prindërve të saj, duke u zhvendosur me një mik të vjetër të familjes në Camden, i cili po studionte për master.
Krahas shkollës dhe punës së modelimit për ASOS dhe Topshop, Dua merrte mësime në fundjavë në Sylvia Young Theatre School.
Përfundimisht videot e saj ranë në sy të Ben Mawson në Tap Management, i cili përfaqëson Ellie Goulding, Lana Del Rey dhe Leigh-Ann Pinnock të Little Mix.
Kënga e saj “Hotter Than Hell”, e cila ishte pjesë e albumit të saj debutues, çoi në nënshkrimin e një kontrate me Warner Bros. Records në 2014.
Ajo publikoi këngën “New Love” në gusht 2015, në të njëjtin muaj kur mbushi 20 vjeç. Kjo u pasua nga “Be The One”, dy këngë që e ngjitën Dua Lipën në majë të klasifikimeve botërore.
Dy muaj më pas këngëtarja u bë artistja e parë femër që u nominua për pesë BRIT Awards në moshën 22 vjeçare ku fitoi dy çmime.
Çmimet ndërkohë vazhduan të vinin. Kënga e saj e vitit 2018 “One Kiss” me Calvin Harris arriti kulmin duke u bërë kënga më e dëgjuar në Britani dhe në vitin 2019 u shpall kënga e vitit në Brit 2019.
Në mars 2020, Dua publikoi albumin e saj të dytë Future Nostalgia, i cili kryesoi listat në 15 vende.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
