Ndryshime të tjera në kalendaret e kampionatit 2021 për shkak të Covid-19, si për Formula 1, ashtu edhe për MotoGP. Garat e programuara në Australi, respektivisht në Melburn dhe në Philip Island, nuk mund të zhvillohen.
Për shkak të masave shtrënguese në lidhje me udhëtimet dhe vështirësive logjistike, Formula 1 dhe “Dorna” kanë vendosur të anulojnë nga kalendari 2021 Çmimin e Madh të Australisë për të dyja kategoritë. F1 këtë vit nuk do të zbarkojë në Melburn, kurse MotoGP duhet të heqë dorë nga cirkuiti spektakolar i Phillip Island.
Makinat e Formulës 1 duhet të garonin në cirkuitin e Melburnit nga 19 deri në 21 nëntor, pas Çmimit të Madh të Brazilit dhe para atij të Arabisë Saudite. Pas anulimit të fundit të garës në Singapor, që u zëvendësua menjëherë me atë të Turqisë për të mbajtur 23 gara në kalendar, organizatorët e F1 janë të detyruar të anulojnë edhe Australinë. Ende nuk dihet, nëse do të gjendet një circuit zëvendësues për këtë garë për të mos e prishur programin e 2021-shit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.