.png)
Sabina Veizaj - Ai thotë se ndihma modeste, sipas tij, që po jep për mjekët shqiptarë, është një formë bashkëngjitjeje ndaj një lëvizjeje botërore në kushtet e pandemisë globale që po vret mijëra njerëz çdo ditë anembanë botës.
Alban Kardashi po prodhon mburoja fytyre (face shields). Ato janë kryesisht plastike dhe pvc. Këto maska janë shumë përdorimshme dhe mund të disifektohen me alkool.
“Kjo nismë në fakt është pjesë e një lëvizje në të gjithë botën ku persona që kanë paisje si printera 3d apo CNC po ndihmojnë në realizimin e mjeteve mbrojtëse për mjekët që janë në vijën e parë të luftës. Duke qenë se studio zotëron paisje të tilla, ishte gjëja e duhur për tu bërë,” shpjegon Kardashi për Gazetën “Si”.
Nisma është krejt vullnetare. Kardashi zotëron studion “A Vizion”, një biznes i vogël familjar i hapur në vitin 2014 ku përpos tij punojnë edhe dy persona të tjerë që aktualisht janë të papunë për arsye se biznesi është i mbyllur me vendim të qeverisë pas masave të marra për situatën e emergjencës që të ndalohej përhapja e mëtejshme e koronavirusit.
Studio merret me design, printime të formateve dhe materialeve të ndryshme, krijimin e objekteve 3d si trofe e kupa, si dhe reklama me e pa ndriçim.
Në këtë mision Kardashin e kanë ndihmuar ta realizojë një grup miqsh të cilët “kanë në qendër të dëshirave të tyre prosperitetin e vendit. Ky grup është gjithmonë aktiv duke marrë nisma sociale”.
Ai tregon se kjo nuk është hera e parë që grupi i miqve kontribuon në nisma të tilla.
“Përvec kësaj nisme mund të përmend edhe krijimin e një platforme online për ti mundësuar nxënësve mësimin nga shtëpia në këto kohë të vështira. https://mesonjetore.mesoshqip.net/.
Po kështu ky grup gjatë situatës të krijuar menjëherë mbas tërmetit ndihmoi me ushqime e veshmbathje. Gjatë vitit të Skëndërbeut, po ky grup vendosi në Maschito të Italisë një bust të heroit tonë kombëtar”- tregon sipërmarrësi Alban Kardashi.
Ai shpjegon se në kushte optimale, mund të prodhojnë deri në 150 copë mburoja në ditë, por duke qënë se biznesi është i mbyllur që prej datës 12 mars dhe punëtorët janë në shtëpi, duke qenë se oraret janë të reduktuara, prodhimi ulet ndjeshëm.
Personat që po merren me montimin e këtyre mburojave, sqaron Albani, nuk janë punonjësit e tij, por janë miq vullnetarë.
“Realizimi i mburojave plastike, bëhet me pajisje cnc dhe asemblimi me dorë. Kjo na merr shumë kohë. Kosto është më e ulët se e maskave që janë në treg. Gjithsesi kostot po përballohen vullnetarisht dhe spitaleve po u dërgohen falas. Mburoja e fytyrës i shërben mjekëve, infermierve, farmacistëve, punëtorëve të tjerë të sistemit shëndetësor, por jo vetëm. Atë mund ta përdorin dhe punëtorë e prodhimit. Në rastin e mjekëve ajo mbron të gjithë fytyrën nga stërkalat që mund të vijnë nga një pacient që tështin”-shpjegon Albani, i cili në asnjë moment nuk ankohet për humbjet që po i shkakton situata dhë në asnjë moment nuk bie pre e pytjeve në lidhje me kostot dhe harxhimet e vullnetarëve.
“Edhe pse biznesi është i mbyllur prej datës 12, kjo nuk na ndalon që në këtë situatë kritike ekonomike e shoqërore të japim kontributin tonë si mundemi. Ndihmës në luftën kundër koronavirusit, i cili ka shkaktuar pandeminë e cila detyroi të gjithë botën të ndalonte i janë bashkangjitur dhe biznese në Tiranë. I tillë është rasti i studios tonë “A Vizion” që bëri të mundur prodhimin e një sasie maskash mbrojtëse plastike për fytyrën të cilat iu dhuruan Spitalit Obstetrik Gjinekologjik “Mbretëresha Geraldinë”. Kjo nismë në fakt është pjesë e një lëvizje në të gjithë botën ku persona që kanë paisje si printera 3d apo CNC po ndihmojnë në realizimin e mjeteve mbrojtëse për mjekët që janë në vijën e parë të luftës. Pasi u njohën me këtë nismë, një grup miqsh e dashamirësisë të cilët i falenderoj morën përsipër të paguajnë një pjesë të kostove për materialeve për të shtuar kësisoj prodhimin e këtyre maskave”, do të lajmëronte Albani pak ditë më parë në llogarinë e tij në Facebook teksa kishte nisur iniciativën.
Këtë të martë, bashkë me grupin e miqve vullnetarë, ai ishte në Spitalin Rajonal të Durrësit për të dhuruar një kontigjent prej 70 mburojash plastike për mjekët, të cilët kishin nevojë urgjente.
Në spitalin e Durrësit 
Në spitalin e Durrësit 
Në spitalin e Durrësit
“Të them të drejtën ndjenjat ishin të përziera. Po ndjenja që mbizotëroi në fund ishte një ndjesi turpi i cili u shkaktua nga gëzimi që shfaqën mjekët kur i dorëzuam maskat. Ata gëzoheshin për diçka aq të vogël e unë do të kisha dashur të bëja 100 fish më shumë. Ata meritojnë shumë më shumë.”- përshkruan Albani ndjesinë që përjetoi pasi dorëzoi maskat në spitalin e Durrësit.
Ai thotë se ka kërkesa nga e gjithë Shqipëria dhe do të mundohen të bëjnë një shpërndarje sipas nevojave “deri sa buxheti, koha dhe fuqia të na e lejojë”
Në lidhje me biznesin e tij ai tregon se humbjet janë të mëdha, sidomos për një biznes të vogël i cili në fund të muajit siguron vetëm të ardhurat e mjaftueshme për të vetëpunesuarit e tij, por “nëse të gjithë do të mendojnë pozitivisht, atëherë secili nga ne kthehet në një shkëndijë të vogël drite. Dhe nëse drita përhapet ajo ngadhënjen mbi ërrësirën e mbas kësaj detyrimisht do të vijnë ditë më të mira.”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
