.png)
Pas vdekjes së mjekut të dytë nga koronavirusi në Shqipëri, Presidenti Ilir Meta i kërkon Qeverisë hartimin me urgjencë të një strategjie të re, efikase e transparente që vendi të përballojë pandeminë.
“Ndarja nga jeta këtë mëngjes e Dr.Hysni Shkjaut është një tjetër humbje e madhe për sistemin tonë shëndetësor. Ritmet shqetësuese të shtimit të rasteve të qytetarëve të prekur nga COVID-19 dhe të numrit të viktimave, tregojnë se nevojitet urgjentisht një strategji e re, më efikase dhe transparente, për përballimin e pasojave të rënda të kësaj pandemie të rrezikshme, veçanërisht me afrimin e pikut të sezonit turistik”, thotë Meta.
Presidenti thotë se çdo neglizhencë e mëtejshme është jo vetëm e papranueshme, por edhe me kosto tepër të rënda për shëndetin e qytetarëve dhe ekonominë e vendit.
“Ndaj përsëris thirrjen e fortë për rëndësinë e rritjes së masave mbrojtëse për të gjithë mjekët, infermierët, sanitarët dhe personelin mbështetës, të cilët janë në vijën e parë të frontit, duke sakrifikuar, deri edhe me jetën e tyre, në mbrojtje të shëndetit të çdo qytetari”, shton ai.
Meta kërkon forcim të bashkëpunimit mes pushtetit qendror dhe bashkive, me qëllim izolimin e përhapjes së mëtejshme të infeksionit dhe ndërgjegjësimin e qytetarëve për të respektuar masat e sigurisë dhe udhëzimet e tjera të autoriteteve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
