Gazeta Si – Liga e Kampionëve luan sot ndeshjet e para të turit të parë eliminator, ku marrin tri skuadra shqiptare: Partizani kampion i Shqipërisë, Ballkani kampion i Kosovës dhe Struga kampione e Maqedonisë së Veriut. Kjo e fundit zbret e para në fushë, më pas radha e Ballkanit dhe Partizanit.
Struga është e vetmja skuadër shqiptare që luan jashtë fushe, në Lituani kundër Zalgiris. Ndeshja nis në orën 18:00. Të besuarit e trajnerit Shpëtim Duro shpresojnë të shkruajnë historinë edhe në Europë, ashtu siç bënë me fitimin e titullit historik në Maqedoninë e Veriut. Struganët kanë shanset e tyre.
Më i egër u tregua shorti me Ballkanin e Ilir Dajës, kampion i Kosovës për herë të dytë radhazi. Ballkani pret në fushën e tij kampionët e Bullgarisë, një skuadër me shumë eksperiencë, që ka shkuar deri në grupet e Championsit pak vite më parë. Trajneri Daja gjithsesi ka theksuar se të tijtë nuk do të luajnë në mbrojtje, por do të sulmojnë për të kërkuar fitoren. Sezonin e kaluar kampionët e Kosovës shkuan në grupet e Ligës së Konferencës.
Partizani pret në ‘Air Albania’ kampionët e Bjellorusisë, Bate Borisov. Një kundërshtar me emër, por jo me shkëlqimin e viteve të fundit. Shanset e kualifikimit mund të jenë të barabarta, por një pjesë e mirë vendoset në 90-minutëshin e sotëm.
Kroati Zoran Zekiç është përzgjedhur si trajneri që mund të udhëheqë Partizanin drejt suksesit në Europë. Klubi i kuq ka bërë edhe një merkato cilësore, që shpresohet të japë efekt menjëherë. Tani fjalën e ka fusha e blertë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.