.png)
Mbyllet sot faza në grupe e Champions League për katër nga tetë prej tyre. Luajnë ndeshjet e fundit grupet E, F, G dhe H, ku gjithçka është e hapur. Në secilin prej këtyre grupeve, në lojë janë tri skuadra për dy vende dhe gjithçka varet nga kombinimi i rezultateve të 90-minutëshit të sotëm. E qetë është vetëm Barcelona që ka siguruar vendin e parë në Grupin F dhe në ndeshjen me Interin pritet të zbresë në fushë me shumë lojtarë stoli.
Lionel Mesi, fituesi i “Topot të Artë”, është lënë pushim nga trajneri Ernesto Valverde. Kishte dyshime për aktivizimin e tij në “San Siro”, por trajneri i katalanasve ka vendosur të mos e grumbullojë për këtë ndeshje argjentinasin. Trajneri Antonio Konte nuk ka të gatshëm Asamoah dhe Galiardinin. Interi e ka në dorën e vet kualifikimin, mjafton të fitojë me Barcelonën dhe zë vendin e dytë, pavarësisht çfarë ndodh në ndeshjen tjetër, Borusia Dortmund-Sllavia e Pargës.
Në Grupin E, Liverpuli kampion në fuqi, Napoli dhe Salcburgu luajnë për dy vende. Secili prej këtyre ekipeve mund të zërë edhe vendin e parë, ku më i avantazhuar është Liverpuli, që duhet të fitojë në fushën e Salcburgut. Napoli i Elseid Hysajt, që ndodhet në një situatë kaotike, ku trajneri Karlo Ançeloti rrezikon shumë shkarkimin, pret Genkun e vendit të fundit. Kualifikohet nëse fiton, por mund ta mbyllë edhe në vend të parë fazën në grupe, nëse Liverpuli nuk fiton në Austri.
Situatë gati e njëjtë edhe në Grupin H, ku Ajaksi, Çelsi dhe Valencia janë në garë për të kapur “trenin e fundit”. Luhet për dy vende dhe Ajaksit, ekipit që kryeson grupin, i mjafton edhe barazimi në fushën e vet ndaj Valencias, por kuptohet që holandezët kërkojnë vendin e parë dhe do të luajnë për fitore, aq më tepër që Çelsi është i favorizuar në letër për ndeshjen me Lilën e vendit të fundit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
