Gazeta Si – Barazim 1-1 në aktin e parë gjysmëfinal të Championsit mes Real Madrid dhe Mançester Sitit. Vinicius zhbllkoi shifrat në pjesën e parë, De Bryjne vendosi paraspeshën në të dytën. Ishin ata yjet e ndeshjes dhe jo Haland, që nuk ishte në ditën e tij më të mirë.
Kualifikimi do të vendoset në Mançester, me anglezët të favorizuar. Mançester Siti e filloi ndeshjen me një dominim territorial dhe me disa raste të krijuara, të neutralizuara nga Kurtua. Një lojë e Guardiolës si në kohët e Barcelonës.
Reali rrezikoi dy herë me Vinicius në këtë pjesë: në të parën pasimi i tij u ndal nga Dias para se Benzema të shënonte me portën bosh, kurse në të dytën braziliani shtangu patriotin Ederson me një gjuajtje nga jashtë zonës.
Po me një gjuajtje nga jashtë zonës barazoi De Bryjne në mesin e pjesës së dytë. Belgu ishte ndalur në disa tentativa nga portieri Kurtua, me të cilin ka edhe një ‘llogari personale’ të hapur nga konflikti në kombëtare.
Duhet theksuar se si trajneri Ançeloti bëri lëvizjet e para nga stoli pas minutës së 80-të, duke hedhur në fushë Asensio dhe Tçuameni. Benzema pati një rast me kokë, por u ndal nga portieri Ederson, që më pas i tha ‘jo’ edhe Tçuamenit.
Guardiola nuk preferoi të bënte asnjë zëvendësim në Madrid, duke mos konsumuar ansjë nga lojtarët e stolit. Me këtë barazim anglezët janë favoritë për kalimin në finale, por Reali nuk ‘vdes’ kurrë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.