Vjen suksesi i parë në Formula 2 për Mik Shumaker, djalin e pilotit të famshëm gjerman Mikael Shumaker, 7 herë kampion bote në Formula 1. Mik Shumaker garon me skuderinë italiane Prema dhe ka dalë u pari në “Çmimin e madh të Hungarisë”, Hungaroring, përpara Matsushita dhe Sete Kamara.
Një tregues i qartë rritjeje për Mik Shumaker, i cili e nisi me disa xhiro të shpejta dhe më pas gradualisht krijoi distancë dhe arriti ta kontrollonte gjithë garën. “Shumaker jr” u tregua i zoti në tentativat e rivalëve për ta parakaluar dhe mbi të gjithë në momentin final të garës, kur Matsushita bëri gjithçka, por mbeti i dyti. Me sa duket, është çështje genesh dhe Ferrari mund të shpresojë, sepse pasardhësi i Mikael Shumaker është në rrugën e duhur për t’u bërë kampion i madh. Nëna Korina nuk i ka përmbajtur dot emocionet pas fitores së parë të djalit të saj në botën e automobilizmit.
Në Formula 3 ka triumfuar Armstrong, i cili arriti të shfrytëzonte në mënyrën më të mirë “pole position”, duke e mbyllur garën para Pulçinit dhe Hjuxhs.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.