.png)
Ministri në detyrë për Evropën dhe Punët e Jashtme, Gent Cakaj, zhvilloi vizitën e tij të parë zyrtare në Kosovë, që prej marrjes së detyrës. Gjatë vizitës në Prishtinë, Cakaj deklaroi se kufiri Kosovë-Shqipëri duhet të hiqet fare për qytetarët e të dyja vendeve dhe se dy vendet duhet të krijojnë një platformë të përbashkët politike.
“Kufiri mes dy vendeve nuk duhet të ekzistojë fare duhet të hiqet menjëherë dhe vendet tona të gëzojnë liri të pakufizuar qarkullimi dhe mundësi për ndërveprim ekonomik” tha zoti Cakaj gjatë takimit me ministrin e Jashtëm të Kosovës, Glauk Konjufca. “Kosova dhe Shqipëria duhet të lëvizin drejt një bashkëpunimi të zgjeruar. Të krijojmë një platformë të përbashkët politike. Politika e Kosovës dhe Shqipërisë duhet të kenë një qasje me synime komplementare. Deri tani bashkëpunimi ka qenë intensiv, por nga tani e tutje duhet të kemi një bashkëpunim maksimal”, tha ministri.
Cakaj mban vizitën e parë në Kosovë, takime me Kurtin, Thaçin dhe Osmanin
Deklaratat e tij kanë shkaktuar jo pak bujë në mediat sociale dhe në mediat në Kosovë.
Gjatë konferencës për shtyp dy ministrat konfirmuan se mbledhja e radhës e dy qeverive do të mbahet në Shkodër, duke theksuar se do të sjellë marrëveshje konkrete mes dy vendeve. Cakaj ka thënë se i ka kërkuar Konjufces firmosjen e një marrëveshjeje për ndarjen e shpenzimeve dhe detyrave për lobimin e Kosovës. "Ne kemi theksuar gjithmonë gatishmërinë tonë, dhe kemi ngritur zërin për qasjen e padrejtë të BE-së karshi Kosovës”, tha Cakaj.
Ndërkaq marrëveshja e dytë është ajo për ndarjen e përvojave në procesin screening, i cili ka të bëjë me hapjen e negociatave për anëtarësim në BE. Duke theksuar se Shqipëria gjendet në një fazë më të avancuar në këtë proces, Cakaj shprehu gatishmërinë për ta ndihmuar Kosovën në këtë proces.
Më pas Cakaj zhvilloi edhe një takim me Kryeministrin e Kosovës, Albin Kurti, ku u zotua për zbatim të marrëveshjeve të arritura mes dy vendeve dhe rishikimin e tyre. Cakaj dhe kryeministri i Kosovës ranë dakord edhe për lobimin për shtetin e Kosovës në arenën ndërkombëtare.
Cakaj zhvilloi po ashtu një takim me Presidentin e Republikës së Kosovës, Hashim Thaçi. Në takim, sipas Ministrise se Jashmte, presidenti dhe Cakaj theksuan rëndësinë e konkretizimit të Partneritetit Strategjik e gjithëpërfshirës mes Shqipërisë dhe Kosovës.
Gjithashtu, Cakaj u takua me Kryetaren e Kuvendit të Kosovës, Vjosa Osmani, e cila shprehu angazhimin e qeverive për thellimin e mëtejshëm të bashkëpunimit ndërparlamentar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
