Trupi i pajetë i një personi është gjetur sot në një tunel të Shupenzës nga banorët e fshatit Zogaj në Bulqizë.
Sipas të dhënave policore viktima është identifikuar si Artur Lleshi, 31-vjeçari nga Bulqiza, i cili rezultonte i zhdukur prej 8 muajsh nga fshati Zogaj i Bulqizës.
Trupi i pajetë, i dekompozuar, është gjetur mesditën e sotme. Në afërsi të kufomës është gjetur një kartë identiteti me gjeneralitetet që i përkasin shtetasit A.Ll, 31 vjeç, i cili ka qenë i larguar nga banesa që në muajin korrik, sqaron policia e Bulqizës.
Artur Lleshi u zhduk në mënyrë misterioze në Maqedoni, ku ai punonte si çoban. Familjarët në atë kohë bënë denoncim në Shqipëri e Maqedoni. Për Lleshin kanë qarkulluar disa hipoteza, mes të cilave edhe përfshirja në trafikun e drogës, por familjarët e mohojnë kategorisht një mundësi të tillë.
Artur Lleshi, nga Bulqiza ka humbur kontaktet më 10 prill 2018 me familjen e tij nga Gostivari. Ai iku të punonte si çoban në Maqedoni. I vëllai dhe familjarët shprehen se ka punuar prej 3 vitesh në Maqedoni.
Arturi u rikthye më 2 prill, për të sjellë paratë në shtëpi dhe për t’u çmallur me familjarët dhe 3 fëmijët e tij të mitur. Më 10 prill, ai u largua nga shtëpia për t’u rikthyer në punën e tij, por që prej asaj dite nuk ka më informacion.
Për herë të fundit ai ka folur në telefon me bashkëshorten e tij. Policia ka nisur hetimet për të verifikuar nëse bëhet fjalë për një vdekje aksidentale apo një vrasje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.