.png)
Bullgaria nuk do të dalë kundër hapjes së negociatave me Maqedoninë e Veriut, por i rezervon vetes të drejtën e bllokimit të bisedimeve në rast se në gjykimin e saj Shkupi nuk ka bërë mjaftueshëm për realizimin e më shumë se 20 kushteve që i ka vendosur.
Parlamenti bullgar miratoi deklaratën sipas të cilës mbështetet hapja e negociatave si me Shqipërinë, ashtu edhe me Maqedoninë e Veriut, por këtë të fundit e kërcënon me bllokim konferencën e parë ndërqeveritare, që formalisht do të hapte negociatat për Shkupin.
Sofja kërkon zbatimin e marrëveshjes së gushtit 2017 për fqinjësi të mirë, ku kërkohet që Maqedonia e Veriut duhet të heqë dorë nga çdo formë pretendime për ekzistencën e një minoriteti maqedonas në Bullgari.
Në deklaratë, Bullgaria këshillon Bashkimin Europian që gjatë bisedimeve të heqin termin “gjuha maqedonase” dhe në vend të kësaj të përdoret termi “gjuha zyrtare e Republikës së Maqedonisë së Veriut”.
“Kleçka” qëndron në faktin që Bullgaria nuk e njeh si gjuhë të veçantë maqedonishten, por e konsideron atë një dialekt lindor të bullgarishtes. Telashi i ri për Shkupin, ndonëse për nga përmasat nuk duket aq sa çështja e emrit me Greqinë, nuk duhet nënvlerësuar, thonë ekspertët në Bruksel.
Mes kërkesave të tjera, Bullgaria kërkon ndryshime madhore në librat arsimorë, sidomos të atyre sa i takon historisë dhe gjeografisë, një qasje tjetër kulturore sa i takon minoritetit bullgar dhe ndalimin e sulmeve mediatike, publike, kulturore dhe monumentale ndaj personave me shtetësi maqedonase që e identifikojnë veten si bullgar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
