Pasditen e sotme është zhvilluar ceremonia e konstituimit të bashkisë së Tiranës dhe betimi për herë të dytë i kryebashkiakut Erion Veliaj. Në këtë ceremoni të posaçme vetë kryeministri Edi Rama ka preferuar që të jetë i pranishëm, madje duke folur përpara këshilltarëve socialistë që të tashmë dominojnë me një shumicë të cilësuar votash.
Në këtë ceremoni kanë marrë pjesë edhe deputetët e Partisë Socialiste e Tiranës, të cilët kanë pjesë e fushatës elektorale për zgjedhjet e 30 qershorit.
Fillimisht është nisur me zgjedhjet e drejtuesve të rinj të këshillit. Zëvendësministri i Drejtësisë, Toni Gogu, një njeri pranë kryebashkiakut Veliajt, është propozuar që të jetë kreu i këshillit bashkiak, duke bërë që socialistët të mos përfaqësohen më me Aldrin Dalipin.
![](http://top-channel.tv/wp-content/uploads/2019/07/gogu.jpg)
Kryetari i Këshillit të Qarkut Aldrin Dalipi vlerësoi kandidaturën e Gogut për detyrën e kreut të Këshillit Bashkiak të Tiranës dhe shprehu bindjen e plotë në përmbushjen me sukses të detyrës. "Duke mbështetur maksimalisht propozimin e drejtuesit të grupit të Partisë Socialiste, për kandidaturën e zotit Toni Gogu, si kryetar i ri i këshillit të bashkisë së Tiranës, më lejoni të vlerësoj se zoti Gogu përcjell cilësi shumë të mira qytetare dhe profesionale për këtë detyrë. Me një eksperiencë shumë të vlerësueshme për nga përkushtimi dhe korrektesa, ai ka drejtuar një organizatë të rëndësishme ndërkombëtare si Word Vision për Shqipërinë dhe Kosovën. Po kaq pozitive do të vlerësoja edhe punën e tij në sistemin e drejtësisë, duke lënë gjurmë të posaçme gjatë veprimtarisë së tij deri në detyrën e zv. ministrit të drejtësisë së fundmi", tha Dalipi.
![](https://gazetasi.al/wp-content/uploads/2019/07/bindja-demokratike-betimi-ne-keshill-1110x740.jpeg)
Më pas këshilli ka vijuar me procedurën e zgjedhjes së drejtuesve të rinj të Këshillit Bashkiak, ku në detyrën e nënkryetarëve u zgjodhën Vjollca Braho dhe Luan Bregasi. Këshilli i bashkiak i Tiranës ka 61 anëtar gjithsej, ku me nga një anëtar janë Bindja Demokratike, Partia Socialdemokrate, Partia Demokracia Sociale, Fryma Demokratike dhe Social Punëtore. Të gjitha mandatet e tjera i përkasin socialistëve, me 56 këshilltarë.
Rama sulmon Bashën, mbron lejet e ndërtimit
Prania e kryeministrit Edi Rama duket se nuk i ka shkuar për shtat kryebashkiakut Veliaj, pasi ka dalë pak në hije. Por kryeministri në fjalimin e tij përpara këshilltarëve të rinj, nuk ka ngurruar që të lartësojë punën e kryer nga Veliaj këto katër vite.
Rama tha se krahasimi me si u gjet Bashkia e Tiranës dhe qyteti dhe si është sot, "është vrastar për ata që e lanë qytetin në derexhe për katër vite më parë".
![](https://gazetasi.al/wp-content/uploads/2019/07/Rama-duke-folur-bashki-1110x682.jpeg)
“Bilanci i derikëtushëm i Bashkisë ëshë padiskutim pozitiv, por padiskutim nevojat janë shumë dhe pritshmëritë. Edhe pse koha ka shkuar, është e nevojshme të mos harrojmë se nga u nisëm katër vite më parë. Krahasimi me si e gjetëm dhe si e kemi Tiranën,është vrastar për ata që e lanë Tiranën në derexhe katër vite më parë. Arsyeja është duke bërë këtë krahasim ne vijimësisht marrim kreditet e nevojshme të besimit të njerëzve për të bërë shumë më shumë”, tha Rama.
Kreu i qeverisës vuri në dukje faktin që zgjedhjet u mbajtën pa opozitën, por tha me bindje se më 30 qershor qytetarët shqiptarë votuan për të drejtën, dhe jo thjesht për të majtën. Me marrjen e mandatit të dytë, kryeministri Edi Rama foli për një sfidë të madhe në vijim, por shtoi se do të punohet njësoj për të gjithë qytetarët.
![](https://gazetasi.al/wp-content/uploads/2019/07/edi-rama-bashki-1110x619.jpg)
"Uroj të gjeni në çdo hap arsye dhe vullnet për të rritur angazhimin në komunitet. Uroj që përfaqësinë e re opozitare në këtë kuvend tuajin të mos e masni me peshën e vogël të numrit të saj, por me peshën e vullnetit të mirë për të dëgjuar zërin e saj për të përfituar bërjen e punës së mirë të përbashkët. Këshilli i shkuar ka qenë rëndom peng i politikë dhe është bllokuar me urdhra nga jashtë kësaj salle, por kjo nuk e ka penguar vendimmarrjen. Por kujdes njësoj e dëmshme do të ishte njësoj sikur numrat e sotme të sillnin mungesën e debatit dhe të prodhonin vendime në mungesë transparente. Askush nuk duhet ta harrojë se në 30 qershor banorët e Tiranës, votuan për të drejtën jo thjesht për të majtës. Duke marrë këtë në mendje, duhet të udhëheq çdo ditë punën tonë", tha Rama.
Oligarkët? Rama jep shifrat
Lejet e ndërtimit ku ka pasur përherë akuza mes opozitës dhe mazhorancës, duke akuzuar për lidhje me oligarkët, Rama akuzoi Bashën se gjatë periudhës që ka qenë kryebashkiak të Tiranës.
Krahasimi duhet bërë sipas kreut të qeverisë, në mënyrë që askush të mos hedh hije mbi punën e bërë.
![](https://gazetasi.al/wp-content/uploads/2019/07/Votimi-i-keshillit-bashkiak-te-Tiranes.jpg)
"Krahasimi si e gjetëm dhe si e kemi sot Tiranë, është vrastar por s'është kjo arsyeja pse ky krahasim duhet bërë, por sepse ne marrim kreditet e nevojshme të besimit, për të bërë më shumë pa lejuar që balta të dobësojë lidhjen e shumicës me ne dhe të hedh hije mbi punën tonë", tha Rama.
Kryeministri Rama nuk la pa përmendur edhe opozitën dhe akuzat e vazhdueshme që ajo ka bërë lidhur më ndërtimet në Tiranë dhe se qeveria favorizon oligarkët. Gjatë fjalës së tij, Rama tha se Bashkia e Tiranës e drejtuar nga Erion Veliaj ndonëse ka dhënë më pak leje ndërtimi në 4 vite se sa Lulzim Basha kur ishte kryetar i kësaj bashkie, ka arkëtuar plotë 5 herë më shumë të ardhura nga taksa e ndërtimit. “Më lejoni ta filloj nga të ashtuquajturit oligarkë, njerëzit e pasur të këtij vendi, disa emra syresh që përtypen dhe ripërtypen si tagjia e gojës së dëshpëruar të opozitës sonë kryesore, në përpjekjen e saj të pandërprerë që shpif e shpif e diçka do mbetet. Rëndom, ndërtimtaria është tabela e preferuar e baltëqitjes së tyre, ku sipas avazit të vjetër, çdo leje ndërtimi është një aferë dhe çdo kullë që ndërtohet është një skëterrë. Sa i paguanin të ashtuquajturit oligarkë, arkës së kryeqytetit deri dje, për një leje ndërtimi? 4% të çmimit të shitjes. Po sot? 8% të çmimit të shitjes. Pra kemi dyfishuar taksën ndaj atyre që përflitemi se u shërbejmë. Po sa ka kontribuar taksa e ndërtimit në buxhetin dhe në zhvillimin e kryeqytetit në kohën kur baltëqitësit e sotëm ishin administratorët e djeshëm të Tiranës? Shifra është interesante. Në vitin 2014 Lulzim Basha firmosi lejen për 680 mijë metra katrorë ndërtim dhe bashkia arkëtoi 11 milionë euro nga taksa e ndërtimit. Ndërsa pas largimit të tyre nga drejtimi i bashkisë së Tiranës, Erion Veliaj firmosi firmosi leje për 550 mijë metra katrorë dhe Bashkia arkëtoi 52 milionë euro. Pra me 130 mijë metra katrorë më pak leje ndërtimi, kjo Bashki në një vit arkëtoi pesëfishin e taksave nga ndërtuesit, 5 herë më shumë se sa ajo e vjetra që natën e kalonte me shejtanin dhe ditën gërhiste, duke bërë duvanë kaurit”, tha Rama.
Kryeministri edhe një herë iu referua çështjes së Teatrit Kombëtar, duke theksuar se edhe një herë se është i vendosur që të ndërtohet duke prishur godinën aktuale.
"“Është kryekëput e pavërtetë se do t’i jepen privatit pjesë nga trualli që sot ka teatri. E dyta, pjesa nga bashkia që do t’i japë është një karakatinë parkingu. Ajo gjendet jashtë pjesës fundore të murit të teatrit. Ai truall do të jepet në këmbim të investimit që bashkia do t’i japë privatit për të financuar Teatrin. Bashkimi i interesave të publikut dhe privatit në këtë rast është thuajse ideal sepse jemi në kushtet e një partneriteti publik dhe privat që nuk u kushton taksapaguesve. As nuk po shembim ndonjë vlerë arkitektonike dhe as nuk jemi ne që mund të akuzohemi si indiferentë të asaj pjese. Madje është merita jonë që pjesa e çmuar e asaj pjese doli në dritë që nga kompleksi i ministrive e deri tek tribuna qendrore e Gerardo Bozës”, tha Rama.
Projektet e reja për Ramën janë Teatri i ri Kukullave, ndërtimi i ri te pjesa e Akademisë së Arteve.
![](https://gazetasi.al/wp-content/uploads/2019/07/veliaj-betimi-1111.jpg)
Betohet Veliaj: 50 terrene sportive
Pas fjalës së kryeministrit, erdhi radha e betimit të kryebashkiakut Erion Veliaj, i cili ka falënderuar Ramën për besimin që është dhënë nga PS-ja për të drejtimin e bashkisë. Një falendërim i dyfishtë për Veliajn me këtë mandat të dytë.
"Kam rënë në dashuri me Bashkië, nostalgjia e një vendin që ke kaluar me përkushtim ditë të tëra, sot jam dysfish i nderuar për besimin që mu dha nga PS dhe nga qytetarët e Tiranës, dhe e kuptoj edhe Edi Ramën kur ma ka dhënë detyrën se sa të vështirë e ka pasur", tha Veliaj.
"Nuk mjafton vetëm të krijojmë një histori të Tiranës, duhet ta komunikojmë këtë histori të Tiranës, reformave dhe punës në administrimin e Tiranës", shtoi ai.
Veliaj tha se u është mirënjohes skuadrës së Bashkisë së Tiranës, nga bashkëpunëtorët e ngushtë si nënkryetarët, deri tek punonjësi më i fundit.
"Unë besoj që arritja më e madhe është njerzillëku, fakti që këtij qyteti i shërbejmë në një mënyrë që rrogat në shtet nuk janë të atij niveli që i shohim në privat, por bashkia shihet si mision ndaj qytetarit. Kjo më bën të ndihem i përkulur dhe shumë krenar për stafin e Bashkisë së Tiranës", theksoi kryebashkiaku.
Veliaj premtoi ngritjen e 50 terreneve të reja sportive dhe fjalën e mbylli me zotimin se "nuk do të zhgënjente gjatë këtij mandati të dytë dhe se do të bënte më të mirën për Tiranën e këtij shekulli të ri".
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.