Ish-kryeministri Sali Berisha do të bëjë të ditur javën e ardhshme datën kur do të mblidhet Kuvendi Kombëtar i Partisë Demokratike, me apo pa miratimin e Bashës.
Këtë pohim Berisha e bëri nga Berati, ku kishte “Foltoren” e radhës: “Javën që vjen do të shpallim datën e mbledhjes së Kuvendit të PD-së. Do të mblidhemi me të drejtën tonë për t’i dhënë PD-së normat më demokratike që meriton”, - u shpreh Berisha.
Ai ka saktësuar se statuti i Partisë Demokratike përcakton në një nga pikat e tij se Kuvendi i jashtëzakonshëm mblidhet kur e thërret një e katërta e delegatëve. Nga Berati Berisha bëri të ditur gjithashtu se ka mbledhur firmat e afër 80% të delegatëve të Kuvendit.
Sipas Berishës, Kuvendi do të përcaktojë edhe nëse kryetari i partisë duhet apo jo të jetë kryeministër i vendit, në rastet kur fiton zgjedhjet. Në “Foltoren” e Beratit Berisha shoqërohej vetëm nga Klevis Balliu dhe Astrit Veliaj, asnjë nga deputetët e zgjedhur më 25 prill nuk ishte i pranishëm.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.