Etrit Berisha, gjithmonë në top-formë, mbrëmjen e djeshme ka “marrë hak” ndaj ish-skuadrës së tij, Atalantës. Spali, ekipi i portierit kueqi, fitoi 1-2 në Bergamo dhe tashmë shpresat e qëndrimit në Serinë A janë shtuar ndjeshëm. Një fitore shumë e rëndësishme në transfertë, që e ngjit Spalin në kuotën e 15 pikëve, duke lënë pas Breshian e Ndojit dhe Xhenoan. Mergjithatë, Berisha me shokë duhet të ngjitin të paktën edhe një shkallë në renditje për të mbijetuar.
Berisha pësoi një gol në fillimin e ndeshjes, kur Iliçiç realizoi bukur me finte, pasi u la i lirë shumë afër portës. Spali reagoi në pjesën e dytë me dy gola dhe ia doli të merrte tri pikë të arta për objektivin sezonal. Në pjesën e dytë u aktivizua titullar edhe mbrojtësi Berat Gjimshiti, i cili këtë herë u pozicionua në krah nga trajneri Gasperini. Por ishte një eksperiment krejtësisht i dështuar, sipas shtypit sportiv italian, pasi mbrotësi i Kombëtares shqiptare nuk mundi ta mbulonte këtë rol.
Gjimshiti është aktivizuar në të gjithë pozicionet e mbrojtjes me tre lojtarë, por në krah ka hasur vështirësi. Ai u vlerësua me notën 5 për paraqitjen në ndeshjen e djeshme, ndërsa Berisha është vlerësuar me notën 6.5. Pas javës së 20-të të kampionatit italian, Atalanta mban vendin e 5-të dhe është në zonën europiane, kurse Spali mban vendin e 18-të.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.