Gazeta Si – Italo-gjermani Domeniko Tedesko, 37 vjeç, është emëruar trajner i Belgjikës. Lajmi është bërë me dije mëngjesin e sotëm nga Federata Belge e Futbollit me anë të një komunikate, ku shkruan: "Paç fat, trajner!"
Tedesko vjen pas eksperiencës me Lajpcigun në Gjermani dhe zëvendëson spanjollin Roberto Martinez te Belgjika. ‘Djajtë e kuq’ zhgënjyen në Botërorin e fundit, duke u eliminuar që në fazën e grupeve, ndaj dhe ndryshimi i trajnerit ishte i pashmangshëm.
Domenico Tedesco is the new head coach of our Devils. Good luck, coach! 🤝🇧🇪 #DEVILTIME pic.twitter.com/KeHHPbVpB3
— Belgian Red Devils (@BelRedDevils) February 8, 2023
Tedesko, me origjinë nga Kalabria, është rritur nga ana futbollistike në Gjermani. Ai ka drejtuar fillimisht të rinjtë e Shtutgartit dhe Hofenheimit. Ka pasur edhe një eksperiencë në Rusi, ku ka drejtuar Spartakun e Moskës. Por më shumë ka rënë në sy kur drejtonte Shalken, pasi zuri vendin e dytë që në sezonin e parë, pas Bajernit të Mynihut.
Pastaj është ulur në stolin e Lajpcigut, me të cilin arriti të fitonte Kupën e Gjermanisë. U shkarkua në shtator dhe tani merr drejtimin e një kombëtareje me emër në një moshë shumë të re, vetëm 37 vjeç. Ka një detyrë të vështirë, sepse duhet të ringrejë ekipin për Europianin 2024.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.