.png)
Nga Gazeta 'SI'- Presidenti Bajram Begaj ka dekretuar ligjin që i hap rrugë investimeve për ndërtimin e resorteve turistike në zonat e mbrojtura.
Sipas arsyetimit të Begajt, pretendimet e Shoqërisë Civile se ligji kërcënon zonat e mbrojtura, nuk janë të sakta dhe nuk përbëjën arsye për t’u mos u dekretuar ligji.
“Organizatat e shoqërisë civile shohin te ligji risk potencial për mbrojtjen e mjedisit, i cili mund të shkaktohet nga zbatimi i gabuar i dispozitave të tij. Ekspertët kushtetues të thirrur në konsultë dhe Institucioni i Presidentit të Republikës nuk e shohin këtë pretendim si çështje që i përket procedurës për shqyrtimin e kushtetutshmërisë. Për probleme që mund të konstatohen gjatë implementimit të ligjit mund të vihen në lëvizje mekanizma të tjerë ligjorë mbrojtës, si nga organet eprore/mbikëqyrëse, ashtu edhe nga organizatat mjedisore. Shqyrtimi i kushtetutshmërisë që bën Institucioni i Presidentit të Republikës është shqyrtim abstrakt dhe i pa lidhur me skenarë të supozuar veprimi”, thuhet në njoftimin e Presidencës.
Lajmi për dekretimin e këtij ligji vjen pak ditë pas njoftimit se dhëndri i Donald Trump, Jared Kushner, do të ndërtojë rezorte turistike në ishullin e Sazanit dhe Zvërnec, të dyja territore brenda zonave të mbrojtura.
Një ditë më parë, kryeministri Edi Rama ironizoi kritikët duke thënë se me shpalljen e investimit të Kushner, "me rregull 3-shi u gjet arsyeja e ligjit për zonat e mbrojtura".
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
