Lajme

Bashkitë e prekura nga tërmeti të bëjnë gati projektet! Austria dhe Zvicra grante 2 mln euro

Austria dhe Zvicra ka lançuar sot (të martën) një grant prej 2 mln eurosh për bashkitë shqiptare të prekura nga tërmeti i nëntorit 2019. Granti do të zbatohet me Fondin Shqiptar të Zhvillimit dhe shoqatat e qeverisjes vendore.

"Granti që ne lançojmë sot është një kontribut i qeverive Zvicerane dhe Austriake për të mbështetur rikuperimin e nevojave urgjente të shkaktuara nga tërmeti, si dhe një materializim i reformës së zhvillimit rajonal të Shqipërisë. Është gjithashtu pjesë e mbështetjes më të gjerë të Zvicrës dhe Austrisë për rikuperim nga dëmet e tërmetit, pjesë e të ashtuquajturit ‘premtim’ nga konferenca e Brukselit në shkurt të këtij viti", tha ambasadori zviceran Adrian Maître.

Kurse Shefja e Zyrës së Agjencisë Austriake të Zhvillimit në Shqipëri Simone Ungersböck bëri me dije se me skemën e Granteve, Qeveritë Zvicerane dhe Austriake synojnë të mbështesin grupet e njerëzve veçanërisht të prekshëm pasi ata janë ata më të dëmtuar nga tërmeti dhe pandemia e covid19. “Është thelbësore që idetë dhe projektet nga bashkitë të bazohen në nevojat dhe kërkesat reale të qytetarëve të prekur dhe gjithashtu të përfshijnë nga afër aktorët e komunitetit lokal, siç janë bizneset dhe OJQ-të””- tha ajo.

Përmes skemës së granteve,bashkitë do të kenë qasje në fonde për rikuperimin dhe përmirësimin e shërbimeve për qytetarët. Procesi i aplikimit do të qëndrojë i hapur deri më 21 shtator dhe do të administrohet nga përfaqësues të Programit të Zhvillimit Rajonal, Fondit Shqiptar të Zhvillimit dhe shoqatave të bashkive. Ai synon të rivendosë dhe të rikuperojë të gjitha aspektet e shërbimeve publike, të rindërtojë infrastrukturën dhe lehtësirat dhe të rigjallërojë ekonominë, turizmin, jetën sociale dhe kulturore të komuniteteve të prekura.

“Kjo skemë grantesh – megjithëse një shumë modeste në raport me nevojat për rindërtim – është një mbështetje e nevojshme dhe e duhur për të plotësuar elemente të caktuara në planin e rindërtimit si dhe për të patur një proces të plotë të rimëkëmbjes”, tha Drejtori i Fondit Shqiptar të Zhvillimit, Dritan Agolli

Bashkitë e prekura që mund të përfitojnë nga granti janë: Shijak, Durrës, Krujë, Tiranë, Kamëz, Vora, Kavajë, Rrogozhina, Kurbin, Mirdita dhe Lezhë.

Programi i Zhvillimit Rajonal Albania IV (RDPA), 2019 - 2023, është një projekt i Agjencisë Zvicerane për Zhvillim dhe Bashkëpunim (SDC) dhe Agjencisë Austriake të Zhvillimit (ADA), e zbatuar në partneritet me Qeverinë e Shqjipërisë.


Copyright © Gazeta “Si”


Më Shumë