Politike

Basha: Rama të dorëhiqet, si Zaev. Duhen zgjedhje të parakohshme

Lulzim Basha kërkoi nga Edi Rama që të vendosë standardin “Zaev”, duke dhënë dorëheqjen dhe të çojë vendin në zgjedhje të reja të parakohshme, për t’i kthyer, siç tha kreu i PD-së, mandatin qeverisës popullit.

Në një deklaratë të shkurtër për mediat, Basha bëri dallimin mes Zaevit dhe Ramës. Ai tha se Maqedonia u refuzua vetëm nga Franca, ndërsa Shqipëria nga një pjesë e madhe e vendeve anëtare të BE-së, që sipas Bashës, provon se moshapja e negociatave për Shqipërinë nuk ishte pasojë e përplasjeve të brendshme të BE-së.

“Ndëshkimi i blerjes së votës, funksionimi i gjykatave të larta në vend, vënia para drejtësisë e të inkriminuarve dhe korruptuarve të lartë janë kërkesa të panegocuara nga BE. Këto nuk janë probleme të BE, siç thotë propagandë qeverisës, por janë probleme të qeverisjes. Krejt e ndryshme paraqitet situata për Maqedoninë e Veriut. Asnjë kusht dhe një mbështetje gati unanime, me përjashtim të një vendi. Megjithatë, Zaev paraqiti dorëheqjen dhe u riktheu mandatin qytetarëve dhe vendi do të shkojë në zgjedhje të parakohëshme parlamentare. Nga ana tjetër qeveria jonë që është refuzuar nga BE vazhdon të mos e lëshojë pushtetin”, deklaroi Basha.

Kreu i PD-së përsëriti qëndrimin e opozitës së integrimit europian është e vetmja rrugë për Shqipërinë dhe shqiptarët, por se kjo rrugë aktualisht është marrë peng, siç tha ai, nga Edi Rama. Refuzimin e negociatave si dështim personal të Edi Ramës, Basha e lexon mes kushteve të vendosura nga Gjermania.

“Dështimi është i Edi Ramës, jo i Shqipërisë. Ky mesazh ka qenë më i fortë se kurrë nga Gjermania që i tha po Shqipërisë dhe jo qeverisë përmes 9 kushteve që duhen përmbushur”, shtoi kreu i demokratëve.

Por a ka mundësinë dhe vullnetin Edi Rama që të plotësojë këto kushte? Basha mendon se jo.

“Kjo nuk i intereson ramës, sepse nënkupton zgjedhje të lira dhe të ndershme, ndarje të politikës nga krimi, ndarje dhe balancim të pushteteve, institucione të forta dhe të pavarura të drejtësisë. Europa ka refuzuar Edi Ramën, jo Shqipërinë. Pa reforma serioze, që ai nuk është në gjendje dhe nuk ka vullnetin që t’i bëjë, Europa do të vazhdojë të refuzojë Edi Ramën”, vijoi Basha.

Basha e mbylli deklaratën me kërkesën që qeveria të ndjekë shembullin maqedonas.

“Shqipëria duhet të ndjekë shembullin e Maqedonisë dhe Qeveria të marrë përgjegjësitë për dështimet dhe t’i kthejë mandatin e popullit. Ne na duhet një qeveri e re, që çon vendin para në procesin e integrimit, e dalë nga zgjedhje të lira dhe të ndershme”, mbylli deklaratën e tij, Lulzim Basha.

 

Më Shumë