Kryetari i opozitës, Lulzim Basha ka reaguar pas ngritjes së shqetësimit për investimet në Shqipëri nga Dhoma Amerikane e Tregtisë.
Basha i ka vlerësuar si realiste konstatimet e Dhomës Amerikane të Tregtisë se korrupsioni është problemi kryesor që pengon investimet e huaja në Shqipëri.
“Dhoma Amerikane e Tregtisë ka konstatuar (pa asnjë surprizë) se korrupsioni është problemi kryesor që e lë pas Shqipërinë në fushën e investimeve të huaja. Është korrupsioni në nivelet më të larta që në mënyrë të pafalshme po i vjedh të ardhmen vendit tonë”, shkruan lideri demokrat.
Kreu i opozitës ka bërë përgjegjëse qeverinë për pasojat e korrupsionit.
“I njëjti institucion i respektuar vlerësoi po sot potencialin e jashtëzakonshëm të Shqipërisë për të thithur investime. Por ky potencial për zhvillim po shkatërrohet nga një qeveri që në gjenezën e saj ka kapjen e shtetit dhe korrupsionin”, vijon më tej Basha.
Më herët, kreu i Dhomës Amerikane, Enio Jaço në një konferencë për shtyp u shpreh se Shqipëria klasifikohet e 82-ta për investimet amerikane dhe kjo vjen si pasojë e klimës jo të favorshme ndaj bizneseve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.