Baltë mbi Barcelonën, klubin e madh spanjoll që rrezikon të njolloset keq. Mbrëmjen e së dielës, gjatë transmetimit të emisionit “El Larguero”, radio “Cadena Ser” ka denoncuar lidhjen mes Barcelonës dhe kompanisë “I3 Ventures”. Sipas saj, klubi spanjoll i ka paguar 1 milionë euro me 6 këste kësaj kompanie për të krijuar dhe administruar profile në rrjetet sociale për të diskretituar dhe hedhur baltë mbi Mesin dhe bashkëshorten e tij Antonela, Pikenë, Ksavin, Guardiolën dhe presidentin e “Mediapro Roures”, ish-presidentin katalanas Puigdemont.
Klubi i Barcelonës është mbrojtur me një komunikatë, ku saktëson se ka një bashkëpunim me “I3 Ventures”, por vetëm për të monitoruar fluksin e mesazheve në rrjetin e klubit dhe se nuk kishte asnjë pikë në kontratë për profilet e cituara nga “Cadena Ser”. Por të hënën në mbrëmje radio në fjalë ka publikuar një dosier prej 36 faqesh, ku konfirmohet administrimi i profileve të “inkriminuara” nga “I3 Ventures”. Pas pak orësh dy site të kompanisë së lidhur me skandalin janë mbyllur.
Pritet një tjetër reagim nga Barcelona, ndërkohë që polemikat janë gati të shpërthejnë. Shqetësimi në këtë moment është jashtëzakonisht i madh për mënyrën e përdorimit të të ardhurave të klubit, që është në pronësinë e disa ortakëve. Do të ketë një çështje ligjore, por meraku më i madh për kupolën drejtuese të Barcelonës është raporti i tendosur me ekipin dhe mbi të gjitha me kapitenin Leo Mesi, i cili shpërtheu publikisht kundër Erik Abidal, drejtorit sportiv të katalanasve. Mesi nuk ka folur ende për skandalin që ka pushtuar Barcelonën, por kuptohet se kjo gjë e ndërlikon së tepërmi situatën dhe argjentinasi mund të largohet gratis, edhe pse ka kontratë deri më 2021-shin.
Presidenti i Barcelonës, Bartomeu, duhet të qetësojë sa më parë situatën, sepse që tani po flitet për zgjedhje të parakohshme në “Camp Nou”. Mandati i Bartomeut skadon në vitin 2021.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.