.png)
Nga Gazeta ‘Si’- Kreu i grupit parlamentar të Partisë Socialiste kritikoi opozitën se sipas tij po lutet që Shqipëria të dështojë në procesin e integrimit në BE.
Balla tha se sfida kryesore e qeverisë dhe Kuvendit është t’i rrijë strikte afateve të vendosura që synojnë mbylljen e negociatave në Krishtlindjet e vitit 2027.
Balla foli gjatë seancës dëgjimore të Komisionit për Punët e Jashtme, që u mbajt me kryenegociatoren, Majlinda Dhuka, për raportin e qeverisë për procesin e integrimit në BE.
Ai kritikoi opozitën se sipas tij jo vetëm nuk lexon ligjet e Kuvendit që u vihen përpara në çdo seancë apo konferencë kryetarësh, por edhe lutet që integrimi i vendit të bllokohet.
Balla i ftoi që për një herë të vetme ta jepnin votën e tyre pro reformave dhe procesit të integrimit, duke e votuar raportin dhe që të mbaheshin mend se kontribuan për këtë proces.
“Gjejeni veten dhe thoni bujrum, jepe një votë, po them po jap një votë, po e vë një tullë. Thuaj po jap edhe unë një dorë, e të thoni që kam kontribuar edhe unë në anëtarësimin e BE-së, ju dashamirësit apo dashnorët e Bashkimit Evropian. Ndaj i referohem vlerësimeve që vijnë nga kryekomisionerja Marta Kos. Ajo thotë se Shqipëria është shembulli më i mirë transformues. Por edhe presidenca daneze e vlerëson progresin shumë mbresëlënës. Ata e vlerësojnë procesin e integrimit të mirë”, tha Balla.
Ai akuzoi kundërshtarët se punojnë për të mos u integruar Shqipëria në BE.
“Ka nga ata që thonë e luten që Shqipëria të dështojë. Shqipëria duhet të jetë dhe do jetë anëtare e BE-së. Ne duhet të nisim përgatitjen që të ketë kandidatët e vetë në zgjedhjet parlamentare të vitit 2029. Raporteri Schider e konsideroi Shqipërinë si vendi me i avancuar, pararojë nëse do i referohesha fjalës fiks, lokomotivë nëse e doni, se pashë pasthirrma pas fjalës time”, tha ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje