Gazeta Si – Mund të mos u pëlqejë atyre që duan futbollin e bukur, por u pëlqen tifozëve të saj. Roma e Leverkusenit ishte akoma më mbrojtëse se zakonisht, nuk gjuajti asnjëherë në portë, por mbrojti golin e shënuar në ndeshjen e parë dhe shkoi në finalen e Budapestit.
Ishte egzaktësisht plani i Mourinjos, një përsëritje e gjysmëfinales së Championsit të 2010-ës me Interin në Barcelonë. ‘Special One’ arrin kështu finalen e 6-të europiane në karrierë. Dhe 5 të tjerat i ka fituar…
Mourinjo e kishte thënë në fakt. Nuk ka dyshim që Roma aktuale, pa disa nga lojtarët kyç, është e kufizuar për të prodhuar futboll të nivelit të lartë europian. Nëse ka shkuar kaq larg, e ka bërë duke shfrytëzuar ‘armët’ që ka në dispozicion, sakrificën e të gjithë lojtarëve dhe aplikimin e loje të hekurt mbrojtëse.
Nuk mund të pretendohet ndryshe nga një skuadër, kur lojtari me kualitet më të lartë i saj është i detyruar të qëndrojë në stol për 90 minuta. Dibala jashtë, Smolling i aktivizuar si zëvendësues pas shumë kohësh në bokse, Spinacola që dëmtohet pa u mbyllur pjesa e parë dhe Bove që adaptohet si anësor i djathtë.
Për këtë Romë është një arritje kualifikimi në finalen e Ligës së Europës në Budapest, ku do të përballet me Seviljen. Mourinjo zgjodhi një 3-5-2 me dy sulmues, Beloti dhe Abraham, të detyruar të tërhiqeshin në gjysmëfushën e tyre. Mbrojtja me 5 lojtarë mbulon hapësirën ku veprojnë sulmuesit e Bajer Leverkusenit. Mesfushorët spostohen horizontalisht me shkallëzim, duke mos u dhënë kohë dhe hapësirë kundërshtarëve.
Më pas hyn Uijnaldum për Belotin dhe Roma kalon në një 3-5-1-1, që mbulon çdo centimetër të fushës. Mourinjo kështu fluturon në finale me mënyrën e vet, me autobusin parkuar para portës, që funksionon ende. Me këtë mënyrë ai ka fituar trofetë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.