.png)
Gazeta Si - Prokuroria e Tiranës ka nisur hetimet për autobusin i cili përfundoi në Lanë mbrëmjen e së premtes, duke rrezikuar jetën e dhjetëra udhëtarëve.
Sipas burimeve paraprake, çështja po hetohet nga prokurori Shpëtim Garunja, i cili e ka regjistruar ngjarjen deri tani si kundravajtje penale.
Kjo, për shkak se nga aksidenti nuk ka viktima dhe të plagosurit janë të dëmtuar lehtë.
Kjo ka sjellë edhe mosarrestimin e asnjë prej drejtuesve të mjeteve.
Por ndërkohë pritet ekspertiza autoteknike e mjeteve si dhe ekspertiza e vendgjarjes së ekspertëve të Policisë Shtetit.
Nga verifikimet paraprake dyshohet për dy pista: një gabim njerëzor dhe një problem elektrik i mjetit.
Në këtë mënyrë do të përcaktohet shkaku i ngjarjes, i cili për pak mund të shndërrohej në një tragjedi.
Autobusi drejtohej nga 62-vjeçari Muhamet Kyçyku, i cili ka qënë duke qarkulluar në korsinë e mesit ka humbur kontrollin dhe nuk ka mundur dot të qëndrojë në stacion.
Për të shmangur përplasjen me mjete të tjera që po qarkullonin në këtë aks, drejtuesi i autobusit është përplasur me mjetin tip “Benz”, duke e nxjerrë edhe atë nga rruga.
Makina, e cila drejtohej nga 27-vjeçari Jurgen Rama, ishte duke qarkulluar paralelisht në korsinë e djathtë në tentativë për të parakaluar.
Më pas mjetet u përplasën me një pemë dhe përfunduan në lumin Lana. Nga aksidenti u plagosën 5 persona, ku tre prej tyre përfunduan në Spitalin e Traumës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
