.png)
Gazeta Si – Detyrë e re për presidentin e FSHF-së, Armand Duka, njëkohësisht edhe pjesëtar i Komiteti Ekzekutiv të UEFA-s, që u mblodh sot në Nion të Zvicrës për të shqyrtuar disa çështje të rëndësishme për zhvillimin e futbollit europian. Në këtë mbledhje u bë edhe përzgjedhja e komisioneve dhe paneleve të reja të UEFA-s.
Armand Duka fitoi mandatin e dytë si anëtar i Komitetit Ekzekutiv të UEFA-s në muajin prill. Ai është konfirmuar sot në postin e nënkryetarit të Komitetit HatTrick, një prej organeve më të rëndësishme në qeverinë e futbollit europian. Po ashtu, presidenti i FSHF-së është zgjedhur në postin e kryetarit të Komisionit të Medias në UEFA.
Sekretari i Përgjithshëm i FSHF-së, Ilir Shulku, është zgjedhur anëtar i Komisionit të Futbollit në UEFA. Pjesë e komisioneve të UEFA-s do të jenë edhe përfaqësues të tjerë të FSHF-së. Anila Basha është zgjedhur anëtare e Komisionit për Futbollin e Femrave, kurse Envi Hicka do jetë anëtar i Komisionit Ligjor të UEFA-s.
Drejtori Teknik i FSHF-së, Fulvio Pea, është zgjedhur anëtar i Komisionit të Zhvillimit dhe Asistencës Teknike në UEFA. Drejtori i Edukimit në FSHF, Sulejman Starova është përzgjedhur anëtar i Panelit Jira, ndërsa përgjegjësi i Futbollit të Fëmijëve në FSHF, Andi Zëre, është zgjedhur anëtar i Panelit të Futbollit Grassroots.
Drejtori i Sektorit të Arbitrimit, Sokol Jareci, është përzgjedhur anëtar i Panelit të Konventës së Arbitrave. Gazmend Malo do të jetë anëtar i Komisionit Këshillimor të Marketingut në UEFA.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
