Ambasadorja e re SHBA në vendin tonë, Yuri Kim, ka zhvilluar këtë të enjte takim me kreun e SPAK, Arben Kraja si dhe me prokurorët e tjerë të kësaj strukture.
Vizita e ambasadores amerikane përkon edhe me afatin e fundit për aplikim për drejtuesin e Byrosë Kombëtare të Hetimit (BKH).
Një ditë më parë, Kim u takua me kryeprokurorin e Përgjithshëm, Olsian Çela. Diplomatja amerikane i garantoi Prokurorit të Përgjithshëm ndihmën e SHBA për zbatimin e Reformës në Drejtësi.
“Gjatë takimit të tyre të parë Ambasadorja e Shteteve të Bashkuara, Yuri Kim, e uroi Prokurorin e Përgjithshëm, Olsian Çela, për zgjedhjen e tij në detyrën e re së fundmi dhe premtoi ndihmë teknike të vazhdueshme nga Shtetet e Bashkuara, për të ndihmuar Shqipërinë në vijimin e zbatimit të Reformës në Drejtësi. Ambasadorja Kim nxiti prokurorët që, ndërsa përmbushin premtimin e një gjyqësori të pavarur me drejtësi për të gjithë, t’i përqasen punës me mendësinë e shërbimit publik, integritetit dhe mbrojtjes së të drejtave të njeriut”, njoftoi Ambasada Amerikane për takimin e djeshëm.
Sa i përket drejtuesit të BKH, Ambasada Amerikane ka bërë disa herë thirrje për të aplikuar për këtë pozicion. Ambasada ka dhënë edhe detajet lidhur me kriteret për aplikimin në pozicionin e Drejtorit të Byrosë Kombëtare të Hetimit.
Ndërkohë të gjithë ata që do të përzgjidhen si pjesë e BKH do të trajnohen në SHBA.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.