.png)
Nga Ina Ahmetaj - Epidemiologu klinik, doktor Ilir Alimehmti i tha Gazetës “Si” se doza e katërt e vaksinës që ka rekomanduar Komiteti Teknik i Ekspertëve nuk është e nevojshme, në kushtet në të cilat ndodhet Shqipëria.
“ Edhe OBSH e konsideron inkosistente aplikimin e dozës së katërt”, thotë ai.
Duke cituar shefin e OBSH-së Soumya Swaminathan i cili thotë se “Organizata Botërore e Shëndetësisë nuk ka dhënë një rekomandim zyrtar për një dozë të katërt dhe "nuk ka asnjë provë të mirë në këtë moment", Alimehmeti nënvizon se në kushtet e një situate të qetë, pa raste të rënda por me një qarkullim normal të variantit BA2 të Omicron njësoj si në Europë, ajo çka duhet bërë është që të mos mendojmë për vaksinim masiv sepse është e pakuptimtë.
Në një intervistë për televizionin CNBC, shefi i OBSH thotë se “Një dozë e katërt nuk bën shumë asgjë... Nuk jam i sigurt se duhet të dalim dhe thjesht të kërcejmë lart e poshtë duke bërtitur se të gjithë duhet të hipin në bord".
"Kjo ndodhi pas dozës së tretë. Dhe ka ndodhur përsëri pas dozës së katërt”, thotë ai.
Shefi i OBSH deklaroi se “ajo që ne dimë nga imunologjia është se nëse jepni një përforcues tjetër, do të shihni një rritje të përkohshme të antitrupave neutralizues. Por ajo që kemi parë gjithashtu është se këto antitrupa neutralizues do të pakësohen mjaft shpejt”.
Nisur nga kjo deklaratë, Alimehmeti thotë se duket i paarsyeshëm rekomandimi i Komitetit tonë të ekspertëve për vaksinim masiv apo aplikim të dozës së katërt tek mosha 60-vjeçare.
“Sidomos kur kjo kategori ka kryer dy doza apo dhe tre, nuk ka vlerë mbrojtja me dozë të katërt. Kjo dozë rekomandohet vetëm për moshat mbi 80 vjeç që kanë sëmundje bashkëshoqëruese të rënda por dhe këtu duhet të shprehemi me rezerva, sepse në rast se ka midis të tyre që e kanë kaluar virusin, pra imuniteti ka treguar se ja ka dalë të mbrohet me 2 apo 3 doza”, thotë doktor Alimehmeti.
Por cilat udhëzime ndjek Shqipëria në lidhje me dozën e katërt të vaksinës, përderisa OBSH nuk e aprovon?
Sipas doktor Alimehmetit, ne ndjekim udhëzimet e FDA në SHBA, e megjithatë harrojmë se nuk jemi njësoj sa i përket mbulimit me vaksina.
“Nëse në SHBA janë aplikuar vaksinat Pfizer, Moderna dhë Jonsson, këtu tek ne pjesën më të madhe të mbulimit në popullatë e kemi me vaksinat kineze. Po ashtu, i vetmi studim për efektivitetin e dozës së katërt të vaksinës është ai Izraelit i cili ka koherencë vetëm 9 javë. Askush nuk di të thotë se çfarë ndodh më pas. Praktikisht ti thuash popullatës vaksinohu kur sot nuk jemi në situatë emergjence, kur rastet janë të lehta si kudo në Evropë, është e panevojshme”, thekson Alimehmeti.
Por çfarë duhet bërë për t'i paraprirë një mutacioni të ri virusi covid?
Doktor Alimehmeti thotë se pika e dobët ku konstatohen probleme sa i takon kontrollit të pandemisë në Shqipëri mbeten trajtimet mjekësore për Covid dhe mungesa e trajnimeve të mjekëve.
“Ajo ç’ka konstatoj të rëndësishme deri në vjeshtë, kur kemi një situatë të qetë është së pari futja në spitale e trajtimeve mjekësore që mjekojnë covid, që të mos kemi mungesa sikurse ndodhi gjatë dy viteve të pandemisë. Duhet të trajnohen mjekët specialistë, psh në Itali do të ishte shumë mirë nisur nga përvoja e tyre gjatë pandemisë, me qëllim që të mos kemi vdekje të larta në intubim, në raport me vendet e tjera. Është momenti të rrisim cilësinë e shërbimeve që ofrojmë në spital”, thotë doktor Alimehmeti.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
