.png)
Deputeti demokrat, Enkelejd Alibeaj, në një deklaratë për mediat nga selia blu theksoi se ende ka heshtje të plotë nga ata që mbajnë përgjegjësi për vjedhjen e votave në bashkëpunim me Vangjush Dakon.
“Nga momenti që skandali i vjedhjes së votave nga bandat kriminale në bashkëpunim me Vangjush Dakon, është bërë publik, heshtja ka mbuluar të gjithë ata të cilët, duhet të mbajnë përgjegjësi për vjedhjen e votave apo për hetimin, gjykimin dhe burgosjen e krimit dhe të politikanëve të lidhur me krimin”,
Sipas tij, Edi Rama dhe Vangjush Dako kanë rënë në grackë dhe nuk po gjejnë qetësi nga makthi i dosjes 339.
“Dosja 339 është ‘gracka ku hajduti është kapur si laraska’. Përgjimet e dosjes 339 kanë faktuar se Vangjush Dako është në komunikim të vazhdueshëm me bandat para, gjatë dhe pas zgjedhjeve, duke shkëmbyer me pasuri dhe pushtet votat e blera për tepsinë e Edi Ramës”, u shpreh deputeti demokrat.
Ai i mëshon fort faktit se mosarrestimi i Dakos dëshmon kapjen e shtetit nga krimi i organizuar, shkatërrimin total të Prokurorisë së Krimeve të Rënda, hedh në erë alibitë qesharake për suksesin e reformës në drejtësi.
“Mosarrestimi i Dakos është dëshmia më e qartë e kapjes së shtetit nga krimi i organizuar me mbështetje të organizatës kriminale të Rilindjes të drejtuar nga Edi Rama. Mosarrestimi i Dakos është prova e shkatërrimit total të prokurorisë së krimeve të Rënda. Mosarrestimi i Dakos hedh në erë alibitë qesharake për suksesin e reformës në drejtësi”, tha ndër të tjera Alibeaj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
