.png)
Kryeministri i sapozgjedhur i Kosovës, Albin Kurti, ka mbajtur mbledhjen e parë të qeverisë.
Kurti teksa ka uruar gjithë kabinetin, u ka kërkuar që të mos rreshtin së punuari për interesat e qytetarëve të Kosovës.
“Është kënaqësi të ju shoh të gjithëve të entuziazmuar për detyrën që keni marrë. Ju uroj të gjithëve për detyrat e juaja. Ky kabinet është i qytetarëve dhe ne do të punojmë për ta. Ata na e kanë dhënë besimin e mandatin. Energjia e qytetarit duhet të jenë motor për punën tonë. 100 ditët e para do të jenë të zëna me punë... Karriget i kemi, por më shumë do të rrimë në këmbë për punën që e kemi”, mësohet të jetë shprehur Kurti.
Kurti ka shprehur bindjen se kabineti i ri qeveritar do bëjë maksimumin në të mirë të vendit.
“Unë nuk kam dyshim se ne kemi aftësi dhe shkathtësi. Sytë e të gjithë popullit janë te ky kabinet qeverisës. Le të bëhemi të thjeshtë e të drejtë”, tha kreu i qeverisë.
Pas mbledhjes së qeverisë, Kurti ka vizituar edhe Prekazin dhe familjarët e viktimave të 3 dhe 4 shkurtit të vitit 2000 në Mitrovicë.
Më herët, Kurti mori zyrtarisht detyrën nga ish-zëvendëskryeministri Behgjet Pacolli, pasi kryeministri në detyrë Ramush Haradinaj, kishte deklaruar se nuk do ta priste liderin e VV.
Siç raportuan mediat kosovare, kjo gjë ka ndodhur në një ceremoni solemne në oborrin e qeverisë së Kosovës, të cilën Kurti do ta udhëheq që nga sot.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
