.png)
Nga Gazeta Si - Aktori i Hollivudit dhe ambasadori i vullnetit të mirë i Kombeve të Bashkuara, Ben Stiller e ka konsideruar presidentin ukrainas, Volodymyr Zelensky si heroin e tij, gjatë një vizite në Kiev.
“Ajo çfarë keni bërë, mënyra si keni mobilizuar shtetin, botën, është vërtet inspiruese”, ka thënë aktori 56-vjeçar, duke iu referuar fjalimeve të Zelenskyt para parlamenteve në gjithë botën.
“Është nder i madh për mua… ju jeni heroi im”, ka thënë Stiller, i cili është emëruar ambasador i vullnetit të mirë i OKB-së më 2018.
Që nga java e kaluar, aktori amerikan Ben Stiller ka udhëtuar në Poloni dhe Ukrainë si ambasador i UNHCR-së, Komisionerit të Lartë të Kombeve të Bashkuara për Refugjatët. Gjatë udhëtimit ai kaloi nëpër Kiev dhe u takua me presidentin ukrainas Volodymyr Zelensky, me të cilin foli edhe për vështirësinë e mbajtjes së vëmendjes së mediave për luftën në Ukrainë me kalimin e muajve.
“Jeni fantastik, keni lënë një karrierë të shkëlqyer aktrimi”, ka thënë aktori ndër të tjera.
“Jo aq i madh sa juaji”, u përgjigj Zelensky, duke e bërë Stiller të qeshte, dhe më pas ia ktheu: “Ajo që bëtë, mënyra se si e bashkove vendin, është vërtet emocionuese”.
Stiller foli gjithashtu me Zelensky-n për ndryshimin midis shikimit të pasojave të luftës me sytë e tij dhe shikimit përmes mediave, nga larg: “Është e vështirë të kuptosh se çfarë po ndodh këtu pa qenë këtu. Ardhja personalisht ka një ndikim të vërtetë, unë isha në Irpin këtë mëngjes dhe pashë nivelin e shkatërrimit. E sheh edhe në TV dhe në rrjetet sociale, por ta shohësh dhe ta jetosh duke folur me njerëzit është krejt histori tjetër”.
Stiller ndodhet në Europën Lindore për një sërë takimesh kryesisht me familje refugjatësh. Javën e kaluar ai ishte në Lviv, në Ukrainën perëndimore, dhe në Rzeszow, në Poloninë juglindore, ku u takua me “familje, jetët e të cilave janë copëtuar nga lufta dhe dhuna”.
Në faqen e tij në Instagram, Stiller shkroi: “Unë jam këtu për të mësuar, për të ndarë histori që ilustrojnë ndikimin njerëzor dhe për të vepruar si një tabelë tingëlluese për solidaritet”.
Para fitores në zgjedhjet presidenciale më 2019, Zelensky është njohur për rolin që ka pasur në serialin televiziv, “Shërbëtori i Popullit”. Zelenski, ish-aktor dhe producent, interpreton një mësues historie, që krejt papritur garon në zgjedhjet presidenciale, duke fituar 70% të votave.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
