.png)
Nga Gazeta ‘SI’ - 52% e familjeve huamarrëse, të anketuara nga Banka e Shqipërisë raportojnë se kanë pasur përkeqësim të aftësisë paguese, nga gjashtëmujori i dytë 2021 në atë 2022. Sipas tyre, kjo ka ndodhur nga rritja e fortë e çmimeve.
Prirje të ngjashme paraqet edhe indeksi i pritjeve mbi aftësinë paguese për gjysmën e parë të vitit 2023, i cili sinjalizon pritje më pesimiste të familjeve krahasuar me gjashtëmujorin e kaluar dhe krahasuar me një vit më parë.
47% e familjeve nuk kanë vënë re asnjë ndryshim në aftësinë e tyre paguese.
Rezultatet e vrojtimit gjashtëmujor që kryhet pranë familjeve për të vlerësuar gjendjen financiare dhe ngarkesën me borxh, tregojnë që rreth 26% e familjeve kishin të paktën një hua për të paguar në momentin e intervistimit. Kjo peshë është rritur me 4 pikë përqindje krahasuar me gjashtëmujorin e kaluar dhe me 2 pikë përqindje krahasuar me një vit më parë, por raporti mbetet pranë mesatares historike të treguesit prej 27%.
Rreth 56% e të anketuarve kanë deklaruar se “nuk presin të marrin hua të re në 6 muajt e ardhshëm”, që nëse rezulton e vërtetë do të ulë më tej kërkesën për kredi. Në grupin e familjeve që planifikojnë të marrin një hua të re, rreth 55% janë “huamarrës të rinj” që nuk kanë hua të papaguar në momentin e intervistimit dhe kjo peshë ka rënë me rreth 5 pikë përqindje nga gjashtë muaj dhe një vit më parë.
“Rënia në vlerën e indeksit të planifikimit të huamarrjes mund të sinjalizojë një ngadalësim të kërkesës së individëve për kredi gjatë gjysmës së parë të vitit 2023. Këto prirje janë të pritshme në kushtet e rritjes së normave të interesit të kredisë, si rezultat i normalizimit të politikës monetare, dhe të pasigurisë së familjeve mbi dinamikat e ardhshme të çmimeve”, thekson raporti i Bankës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
