.png)
Kryeministri Edi Rama premtoi nga Vlora hapjen e garës për tenderin e ndërtimit të Aeroportit në këtë qytet, një projekt ambicioz, por që është zvarritur për shkak të tërheqjes së një grupi kompanish turke që u interesuan fillimisht për ndërtimin e tij.
“E ngrimë procesin aty ku ishte dhe brenda pak ditëve, në javën e parë të tetorit procesi do të rifillojë. Edhe pak ditë dhe ne do të marrim ofertat ndërkombëtare për të nënshkruar kontratën e ndërtimit të Aeroportit të Vlorës”, u shpreh Kryeministri.
Qeveria hapi garën ndërkombëtare për ndërtimin e këtij aeroporti në prill të 2019-ës pas tërheqjes së turqve nga ndërtimi i kësaj vepre. Arsyet e tërheqjes mbeten ende mister, ndërkohë që Rama theksoi se tërmeti dhe pandemia e vonoi rihapjen e garës.
Një konsorcium me tre kompani turke, udhëhequr nga “Cengiz Construction” shfaqi interes për ndërtimin e aeroportit të Vlorës në fillim të 2018-ës. Konsorciumi në fjalë ka lidhje të forta me Presidentin turk, Recept Taip Erdogan dhe interesimi i tyre për ndërtimin e këtij aeroporti mbërrinte pas premtimit që Rama kishte marrë nga Presidenti turk për ta ndihmuar në ngritjen e kompanisë ajrore “Air Albania”.
Por, pas tërheqjes misterioze të turqve, Rama deklaroi se Qeveria po shqyrtonte mundësinë që këtë aeroport ta ndërtonte me paratë e buxhetit të shtetit dhe më pas t’i jepej një kompanie serioze ndërkombëtare për menaxhim. Rama tha në shtator të 2019-ës se synimi ishte hapja e kantierit të ndërtimit në pranverën e 2020.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
