.png)
Mentor Kasa - Me autorizimin e Gjykatës për Krimet e Rënda, forcat speciale të Policisë së Shtetit zbarkuan në orët e para të mëngjesit të së premtes në banesat e tre gjyqtarëve që zbutën dënimin për Dritan Dajtin, autorin e vrasjes së katër policëve në ngjarjen e ndodhur në korrik të 2009 në qytetin e Durrësit.
Operacioni është mbajtur sekret, por përmes një njoftimi të shkurtër të shpërndarë nga Policia e Shtetit thuhet se gjatë gjatë kontrolleve në banesat e gjyqtarëve Skënder Damini, Petrit Aliaj dhe Aleks Nikollës janë sekuestruar disa mijëra euro, municione dhe prova të tjera që po administrohen nga hetuesit.
Një sinjal se për çfarë kërkohet u dha mbrëmjen e së enjtes nga ministri i Brendshëm, Sandër Lleshaj.
“Nuk ka pasur shantazh ndaj gjyqtarëve. Ndoshta kanë marrë para”, tha ministri në një intervistë dhënë për televizionin A2.
Duke përjashtuar mundësinë e shantazhit dhe kërcënimeve nga ana e të dënuarit ndaj tre gjyqtarëve që i njohën atij gjykimin e shkurtuar, e rrjedhimisht i zbritën ndëshkimin nga burg përjetë në 25 vite burg, kjo deklaratë e Lleshajt nënkupton se gjyqtarët që ndryshuan vendimin mund të kenë marrë para.
Dyshimi i ministrit të Brendshëm u përforcua nga kontrolli në banesën e gjyqtarit Skënder Damini. Nga kontrollet në banesën e këtij të fundit në kodrat e Liqenit Artifical mësohet se është gjetur një sasi prej 20 mijë eurosh. Policia e ka sekuestruar këtë shumë dhe hetimet e mëtejshme do të zbardhin burimin e këtyre parave.
Megjithatë, aksioni në fjalë mbart disa hije dyshimi. Së pari, banesat e tre gjyqtarëve në Tiranë, Vlorë, Sarandë dhe Lezhë u bastisën me urdhër të kolegëve të tyre nga Krimet e Rënda, pikërisht aty ku u zvarrit për një dekadë dosja “Dajti” dhe ku u konsumua një prej rasteve më të pashembullt në historinë e shkurtër të drejtësisë shqiptare.
Gjyqtarët e Krimeve të Rënda u konsumuan njëri pas tjetrit në proceset gjyqësore ndaj Dritan Dajtit dhe në momentin që Gjykata e Lartë vendosi në 2016 të rikthejë çështjen për rigjykim në Apelin e Krimeve të Rënda, por me një trupë tjetër gjyqtarësh, nuk kishte më gjyqtarë që nuk e kishin kaluar nëpër duar këtë dosje.
Për të zgjidhur ngërçin u aktivizua Këshilli i Lartë i Drejtësisë, institucion që u shua së fundmi në kuadër të reformës në drejtësi. Si zgjidhje, ky Këshill gjeti delegimin e pesë gjyqtarëve nga gjykatat e Apelit në rrethe.
Në fund të këtij procesi, çështja iu caktua tre gjyqtarëve të Apelit të Shkodrës, Fuat Vjerdha, Lindita Hoxha dhe Aleks Nikolli, si dhe dy nga Apeli i Vlorës, që ishin Skënder Damini e Petrit Aliaj. Kërkesa e Dritan Dajtit ishte e thjeshtë: aplikimi i gjykimit të shkurtuar, që i ulte automatikisht me 1/3 dënimin e mëparshëm.
Dajti e bazonte kërkesën e tij në faktin që në vitin 2009, kohë kur u krye krimi, kjo vepër penale, pra ajo e vrasjes së punonjësit të Policisë së Shtetit nuk ishte e përjashtuar nga veprat penale që u ndalohej aplikimi i gjykimit të shkurtuar. Por, pavarësisht kësaj, Apeli për Krimet e Rënda nuk ishte i detyruar që të pranonte këtë formë gjykimi, pasi kjo gjykata e ka tagrin për të refuzuar kërkesa të tilla.
Një tjetër faktor që rrezikon të shfryjë aksionin e policisë në banesat e gjyqtarëve në fjalë është mungesa e Inspektoriatit të Lartë të Drejtësisë. Ky është institucioni i vetëm i parashikuar në kuadër të reformës në drejtësi që mund të hetojë dhe dërgojë në Këshillin e Lartë Gjyqësor kërkesën për shkarkim të gjyqtarëve.
Por, ky institucion nuk është ngritur ende dhe sinjalet se kjo mund të ndodhë në një kohë të shkurtër janë të zbehta.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
