Kryeministri Edi Rama ndodhet në Arabinë Saudite në një vizitë zyrtare, ku në agjendë ka disa takime të rëndësishme. Ditën e sotme, në Mbretërinë e Arabisë Saudite, Rama u prit nga mbreti Salman ibn Abdulaziz Al Saudi.
Kreu i qeverisë bën të ditur se pas takimit u nënshkruan disa marrëveshje të rëndësishme bashkëpunimi mes të dy vendeve.
“Në pritjen shumë miqësore të mbretit Salman ibn Abdulaziz Al Saudi, ku pas drekës zyrtare u nënshkruan disa marrëveshje të rëndësishme bashkëpunimi”, shprehet Rama.
Në kuadër të kësaj vizite në Mbretërinë e Arabisë Saudite, Kreu i Ekzekutivit zhvilloi gjithashtu sot një takim me Shefin e Fondit Saudit të Zhvillimit, ku në fokus të takimit ishte programi i bashkëpunimit mes dy vendeve që konsiston në ekonomi, turizëm, arsim dhe trashëgimi kulturore.
Më herët, ministrja e Financave dhe Ekonomisë, Anila Denaj, pjesë e delegacionit shqiptar, zhvilloi një takim shumë të rëndësishëm me Ministrin e Financave, Mohammed bin Abdullah Al-Jadaan, ku u shqyrtuan aspektet e bashkëpunimit financiar dhe ekonomik mes dy vendeve, dhe diskutuan një numër çështjesh me interes të përbashkët dhe mjetet për t’i forcuar ato.
Gjatë këtij takimi u arrit nënshkrimi i Marrëveshjes për eleminimin e taksimit të dyfishtë, çka nënkupton më shumë bashkëpunim mes komunitetit të biznesit dhe nxitjes së investimeve të huaja. Për të krijuar një klimë të favorshme për biznesin e sidomos atë të huaj, qeveria shqiptare zbaton Marrëveshjet e eleminimit të taksimit të dyfishtë me 41 vende të ndryshme.
Marrëveshja e heqjes së taksimit të dyfishtë edhe me Arabinë Saudite pritet të rrisë bashkëpunimin mes dy vendeve në fusha të ndryshme të ekonomisë, si dhe rritjen e shkëmbimeve tregtare. Ministrja Denaj është pjesë e delegacionit qeveritar që po zhvillon një vizitë zyrtare dy ditore në Arabinë Saudite.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
