Tentativat për të futur në institucionet e vuajtjes së dënimit sende apo objekte të paligjshme, kalojnë kufijtë e imagjinatës.
Familjarët e disa personave të burgosur kanë tentuar të fusin 3 celularë në burgun e Lezhës, por ato ishin fshehur brenda një tenxhereje. Kjo e fundit ishte e mbushur me gjellë dhe poshtë kishte një fund të dyfishtë.
Pas një kontrolli të imtësishëm të punonjësve të policisë së burgjeve është bërë e mundur edhe gjetja e celularëve. Materialet e çështjes i kanë kaluar Prokurorisë së rrethit për të vijuar hetimin e kësaj çështjeje dhe zbulimin e autorëve të saj.
Ky nuk është rasti i parë, kur sendet e ndaluara tentohen të futen në burgun e Lezhës. Pak muaj më parë, policia kapi një top futbolli të fryrë, që u hodh nga jashtë rrethimit të burgut dhe që në brendësi kishte 3 celularë.
Burimet nga burgjet nuk pranuan të flasin për personat e dënuar që do të merrnin tenxheren, por thanë se ngjarja po hetohet bashkë me Prokurorinë.
Ndërsa brenda vetëm gjatë muajit janar 2019 policia e burgjeve ka mundur të kapë 15 celularë, që tentonin të futeshin apo ishin futur në burgje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
