Alarme të rreme për bomba në të paktën 14 fluturime evropiane, avionët luftarakë ngrihen në ajër

Të paktën 14 fluturime evropiane u vunë në shënjestër të kërcënimeve për bomba të enjten, duke detyruar disa vende të aktivizonin avionët luftarakë dhe të merrnin masa të jashtëzakonshme sigurie. Të gjitha kërcënimet rezultuan të rreme, ndërsa asnjë lëndë shpërthyese nuk u gjet në avionët e kontrolluar.

Incidentet u regjistruan për të tretën ditë radhazi këtë javë dhe prekën kryesisht kompani ajrore me kosto të ulët, si Ryanair dhe Wizz Air, si dhe fluturime drejt ose nga Bullgaria, Republika Çeke dhe Italia.

Avionë luftarakë italianë, francezë dhe bullgarë u ngritën me urgjencë për të shoqëruar disa prej avionëve të dyshuar. Tre fluturime u detyruan të ndryshonin itinerarin, por të gjithë avionët u ulën të sigurt.

Një fluturim i kompanisë Finnair, nga Helsinki drejt Romës, u shoqërua nga avionë luftarakë italianë deri në aeroportin Fiumicino, ku pasagjerët dhe avioni iu nënshtruan kontrolleve të sigurisë. Kompania konfirmoi se nuk u gjet asgjë e pazakontë. Një tjetër fluturim i saj, nga Helsinki drejt Vjenës, ishte gjithashtu objekt i një kërcënimi të rremë.

Edhe një avion i Aer Lingus, në linjën Dublin-Romë, u drejtua nga avionë luftarakë francezë drejt një baze ushtarake në periferi të Parisit.

Ryanair dhe Wizz Air mes kompanive të prekura

Bullgaria ishte një nga vendet më të prekura nga incidentet. Tre avionë të Ryanair, që udhëtonin drejt Sofjes nga Madridi, Kopenhaga dhe Londra Stansted, morën kërcënime për bomba. Dy prej tyre u ulën në Sofje, ndërsa avioni i nisur nga Londra u devijua drejt aeroportit të Plovdivit.

Të tre avionët u shoqëruan nga avionë luftarakë bullgarë dhe iu nënshtruan kontrolleve pas uljes. Ministria e Brendshme konfirmoi se nuk u gjet asnjë lëndë shpërthyese.

Ndërkohë, një fluturim i Wizz Air nga Milano drejt Varshavës u devijua për në Vjenë pas marrjes së një kërcënimi. Një tjetër avion i së njëjtës kompani, në linjën Milano-Bukuresht, u ul normalisht në destinacion, ku autoritetet rumune aktivizuan një njësi krize.

Edhe aeroporti i Pragës u përball me disa kërcënime. Katër avionë që udhëtonin drejt kryeqytetit çek, të operuar nga Ryanair, EasyJet dhe Sky Express, u bënë objekt i alarmeve për bomba. Policia çeke deklaroi se vlerësimi fillestar e konsideronte të ulët besueshmërinë e kërcënimeve, por theksoi se të gjitha masat e nevojshme të sigurisë ishin aktivizuar.

Sipas drejtuesve të aeroportit, kërcënimet ishin marrë përmes e-maileve të dërguara nga adresa anonime.

Në Kopenhagë, dy avionë që mbërritën në aeroport u përballën gjithashtu me kërcënime të ngjashme. Policia daneze deklaroi se, sipas vlerësimit të saj, nuk kishte pasur asnjë rrezik për pasagjerët apo personat e tjerë në aeroport.

Më shumë se 20 kërcënime brenda javës

Gjatë kësaj jave janë raportuar më shumë se 20 kërcënime të rreme për bomba në fluturimet evropiane, ndërsa Ryanair është prekur nga të paktën shtatë prej tyre.

Të martën, dhjetë fluturime u vunë në shënjestër të kërcënimeve, të cilat rezultuan të gjitha të pabazuara. Alarmet shkaktuan edhe mbylljen e një aeroporti në Varshavë dhe ngritjen në ajër të avionëve luftarakë italianë për shoqërimin e disa fluturimeve.

Ndërsa të hënën, një avion i Wizz Air, që udhëtonte nga aeroporti Luton i Londrës drejt Sofjes, u detyrua të devijonte itinerarin dhe të bënte një ndalesë emergjente në Budapest pas një kërcënimi për bombë.

Deri më tani, origjina dhe motivet e këtyre kërcënimeve mbeten të panjohura. Megjithatë, incidentet po ndodhin në një periudhë kur autoritetet evropiane kanë ngritur shqetësime për shtimin e sulmeve hibride në kontinent, të cilat në disa raste janë lidhur me Rusinë dhe Iranin.

Muajin e kaluar, Nicolas Roche, Sekretari i Përgjithshëm i Francës për Mbrojtjen dhe Sigurinë Kombëtare, paralajmëroi për shtimin e veprimeve të tilla në Evropë, duke përmendur sabotimet, sulmet kibernetike, aktivitetin e dronëve dhe spiunazhin.

Pavarësisht numrit të lartë të alarmeve, autoritetet kanë bërë të ditur se të gjitha kontrollet e kryera deri më tani kanë rezultuar negative dhe nuk është konstatuar asnjë eksploziv në avionët e përfshirë.

---

Copyright © Gazeta “Si”

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.

---