.png)
Zgjedhjet e mesmandatit në SHBA sollën një sërë arritjesh historike për përfaqësimin e pakicave në politikën amerikane. Votuesit i dhanë mbështetje kandidatëve demokratë, duke hapur rrugën për zgjedhjen e guvernatores së parë me ngjyrë, senatorit të parë homoseksual që e deklaron hapur orientimin e tij seksual dhe guvernatores së parë me prejardhje nga popujt indigjenë.
Bill Shiebler, drejtues i strategjisë në organizatën jofitimprurëse State Voices, një rrjet që promovon angazhimin qytetar dhe barazinë, e cilësoi këtë rezultat si një goditje ndaj urrejtjes dhe përçarjes.
Sipas tij, zgjedhjet treguan se gjithnjë e më shumë qytetarë e gjejnë veten te liderët që vijnë nga komunitetet që ata përfaqësojnë.
Keisha Lance Bottoms, guvernatorja e parë me ngjyrë
Në shtetin e Xhorxhias, demokratja Keisha Lance Bottoms fitoi garën për guvernatore, duke u bërë gruaja e parë me ngjyrë e zgjedhur në këtë post në historinë e SHBA-së.
Ish-kryetarja e bashkisë së Atlantës mposhti miliarderin Rick Jackson, drejtues në sektorin e kujdesit shëndetësor. Fitorja e saj riktheu postin e guvernatorit te demokratët, pas më shumë se dy dekadash kontrolli republikan.
Chris Pappas, senatori i parë homoseksual që e deklaron hapur orientimin e tij
Në New Hampshire, demokrati Chris Pappas fitoi garën për Senatin, duke u bërë burri i parë që e deklaron hapur se është homoseksual dhe që zgjidhet në këtë institucion.
Pappas ka qenë anëtar i Dhomës së Përfaqësuesve që nga viti 2019.
“Askush nuk duhet të diskriminohet për shkak të asaj se kush është ose kë dashuron”, është shprehur ai.
Deb Haaland, guvernatorja e parë me prejardhje indigjene
Një tjetër fitore historike u shënua në New Mexico, ku demokratja Deb Haaland u zgjodh guvernatore, duke u bërë gruaja e parë vendase amerikane që merr këtë post.
Haaland, anëtare e fisit Laguna Pueblo, mundi republikanin Gregg Hull. Ajo ka shërbyer më parë si Sekretare e Brendshme në administratën e Joe Bidenit, duke u bërë personi i parë vendas amerikan në këtë detyrë ministrore.
Gina Hinojosa dhe Abdul El-Sayed, kandidatë për arritje të tjera historike
Në Teksas, fitorja e Gina Hinojosës solli një tjetër moment historik, duke e bërë atë guvernatoren e parë me origjinë latine në këtë shtet.
Ndërkohë, në Michigan, demokrati Abdul El-Sayed ishte në një garë të ngushtë për t’u bërë myslimani i parë i zgjedhur në Senatin amerikan.
Ish-administratori i shëndetësisë tërhoqi turma të mëdha gjatë fushatës, duke premtuar kujdes shëndetësor falas.
Hakeem Jeffries mund të bëhet kryetari i parë me ngjyrë i Dhomës së Përfaqësuesve
Një tjetër zhvillim historik mund të vijë me formimin e Kongresit të ri. Nëse Hakeem Jeffries, udhëheqësi aktual i pakicës demokrate në Dhomën e Përfaqësuesve, zgjidhet kryetar i kësaj dhome, ai do të bëhet personi i parë me ngjyrë që mban këtë post në historinë e SHBA-së.
Duke komentuar rezultatet, Bill Shiebler tha se këto zgjedhje treguan besimin e qytetarëve te vetja dhe te premtimi amerikan për një shoqëri ku të gjithë kanë mundësi të përfaqësohen.
Sipas tij, rezultatet përfaqësojnë një hap të rëndësishëm drejt një demokracie më gjithëpërfshirëse, ku zërat e komuniteteve të ndryshme kanë gjithnjë e më shumë hapësirë në udhëheqjen e vendit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje