.png)
Një studim i kryer në Finlandë sugjeron se burimi i proteinave në ushqimin e përditshëm mund të lidhet me nivelet e testosteronit te burrat. Ata që konsumonin më shumë proteina bimore kishin nivele më të larta të këtij hormoni, ndërsa konsumimi më i madh i proteinave shtazore lidhej me nivele më të ulëta. Megjithatë, studiuesit theksojnë se rezultatet nuk provojnë një lidhje shkak-pasojë.
Sporti, duhani, alkooli dhe cilësia e gjumit janë ndër faktorët që diskutohen shpesh për ndikimin e tyre në nivelet e testosteronit te burrat. Por edhe ushqyerja mund të luajë një rol të rëndësishëm, veçanërisht burimi nga i cili merren proteinat.
Një studim i Universitetit të Finlandës Lindore, i realizuar me 2.546 burra, ka zbuluar një lidhje mes konsumit të proteinave dhe përqendrimit të testosteronit në gjak. Sipas rezultateve, burrat që konsumonin më shumë proteina bimore kishin nivele më të larta të testosteronit total, ndërsa ata që merrnin më shumë proteina shtazore shfaqnin nivele më të ulëta.
Çfarë treguan rezultatet?
Studiuesit analizuan të dhënat e burrave të moshës 42 deri në 60 vjeç, të cilët jetonin në Finlandën Lindore.
Ushqyerja e tyre u regjistrua për katër ditë gjatë periudhës 1984–1989, ndërsa analizat e gjakut u përdorën për të matur testosteronin total dhe SHBG-në, një proteinë që lidhet me hormonet seksuale dhe ndikon në sasinë e testosteronit që qarkullon në gjak.
Rezultatet treguan se burrat që konsumonin sasinë më të madhe të proteinave shtazore kishin, mesatarisht, 1,2 nanomole për litër më pak testosteron total krahasuar me ata që konsumonin sasinë më të vogël.
Në të kundërt, burrat me konsumin më të lartë të proteinave bimore kishin 1,1 nanomole për litër më shumë testosteron total sesa ata në grupin me konsumin më të ulët.
Analizat treguan gjithashtu se marrja më e lartë e proteinave nga produktet e qumështit lidhej me përqendrime më të ulëta të testosteronit total dhe SHBG-së. Ndërsa proteinat nga mishi lidheshin me nivele më të ulëta të SHBG-së, por jo me ndryshime të testosteronit total.
Cilat ushqime bimore përfshihen?
Proteinat bimore mund të merren nga një sërë ushqimesh që mund të bëhen pjesë e dietës së përditshme.
Ndër burimet kryesore janë:
Fasulet, thjerrëzat, qiqrat dhe bizelet.
Brokoli, spinaqi dhe perime të tjera.
Arrat, bajamet dhe farat e kungullit.
Ushqimet me bazë soje.
Këto ushqime ofrojnë jo vetëm proteina, por edhe fibra, vitamina, minerale dhe përbërës të tjerë të dobishëm për organizmin.
A do të thotë kjo se mishi ul testosteronin?
Jo domosdoshmërisht. Studiuesit theksojnë se rezultatet nuk provojnë që proteinat shtazore ulin drejtpërdrejt testosteronin apo që kalimi në një dietë me bazë bimore e rrit atë.
Arsyeja është se studimi ishte tërthor (cross-sectional), që do të thotë se analizoi lidhjet mes ushqyerjes dhe niveleve hormonale në një periudhë të caktuar, pa vërtetuar se njëri faktor shkakton tjetrin.
Për më tepër, studiuesit morën parasysh faktorë të tjerë, si mosha, indeksi i masës trupore, mënyra e jetesës dhe karakteristika të ndryshme të ushqyerjes. Megjithatë, ndikimi i faktorëve të tjerë nuk mund të përjashtohet plotësisht.
Miika Wynne-Ellis, studiues doktorature në Universitetin e Finlandës Lindore, theksoi se, megjithëse ndryshimet e vërejtura ishin statistikisht të rëndësishme, ato ishin relativisht të vogla.
Çfarë duhet të bëjnë burrat?
Mesazhi kryesor i këtij hulumtimi nuk është eliminimi i mishit apo produkteve të qumështit nga dieta, por rëndësia e një ushqyerjeje të larmishme dhe të ekuilibruar.
Përfshirja e më shumë bishtajoreve, perimeve, arrave dhe farave mund të ndihmojë në përmirësimin e cilësisë së përgjithshme të ushqyerjes. Po ashtu, aktiviteti fizik i rregullt, gjumi cilësor dhe ruajtja e një peshe të shëndetshme janë elemente të rëndësishme për shëndetin hormonal.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje