.png)
Gazeta Si – FIFA, organi drejtues i futbollit botëror dhe organizatori i Kupës së Botës, pritet të krijojë një degë të re me vlerë 20 miliardë dollarë: e quajtur “FIFA Forward Enterprise” (FFE), ajo do të shërbejë kryesisht për të mbledhur fonde nga investitorë të jashtëm, të cilët do të kenë mundësinë të blejnë deri në 20 për qind të aksioneve.
Grupi i investitorëve do të drejtohet nga Joshua Kushner, themeluesi i firmës së investimeve “Thrive Capital” dhe vëllai më i vogël i Jared Kushnerit – bashkëshortit të Ivanka Trump-it. Dihet se Infantino dhe presidenti i SHBA-ve, Donald Trump, gëzojnë një marrëdhënie shumë të mirë.
FFE do të menaxhojë shitjen e të gjitha të drejtave që lidhen me FIFA-n (sponsorizimet, biletat, licencimin dhe paketat e transmetimit), si dhe menaxhimin operacional të turneve, përfshirë Kupën e Botës dhe Kupën e Botës për Klube.
Lajmi u raportua të martën nga gazeta “Financial Times”, e cila theksoi se qëllimi i Infantinos është të mbledhë 4,2 miliardë dollarë deri në fund të vitit.
Pak orë më vonë, FIFA lëshoi një deklaratë ku konfirmoi si krijimin e kompanisë së re, ashtu edhe rolin e Kushner-it.
Ky veprim ka shkaktuar kritika të ashpra nga UEFA (organi drejtues i futbollit evropian) dhe nga figura të ndryshme të sektorit, për shkak të mungesës së transparencës.
Hyrja e investitorëve të jashtëm mund të cenojë pavarësinë e FIFA-s dhe të ndryshojë rrënjësisht identitetin e saj, duke qenë se ajo është formalisht një organizatë jofitimprurëse.
“Shpirti dhe menaxhimi i futbollit nuk janë mallra për t’u tregtuar, veçanërisht kur nuk është e qartë se kush do të përfitojë”, – thuhet në një deklaratë të UEFA-s.
Marrëdhëniet mes dy organizatave janë përkeqësuar vitet e fundit. Presidenti i UEFA-s, Aleksander Čeferin, refuzoi të merrte pjesë në finalen e Kupës së Botës pas një sërë mosmarrëveshjesh lidhur me procedurat disiplinore dhe organizimin e ndeshjeve.
Ndërkohë, Infantino theksoi efektet e mundshme rishpërndarëse të kompanisë së re, duke e përshkruar atë si fillimin e një “demokratizimi global të futbollit” dhe duke dhënë garanci se ajo do të menaxhohej drejtpërdrejt nga FIFA, pa ndërhyrje të jashtme.
Investitorët do të mund të blejnë vetëm aksione në pakicë, deri në një maksimum prej 20 për qind. Në këtë mënyrë, FIFA do të ruajë shumicën e aksioneve në kompani dhe do të mbajë kontrollin mbi vendimet strategjike dhe drejtimin e përgjithshëm të saj.
Fondet e mbledhura nga FFE do të shpërndahen midis 211 shoqatave anëtare të FIFA-s përmes një pagese të veçantë dhe të vetme prej 20 milionë dollarësh për secilën.
Sipas vlerësimeve të organizatës, kontributet vjetore që FIFA u jep këtyre shoqatave do të rriten nga 2 milionë në 5 milionë dollarë në vit gjatë periudhës 2027-2030.
Për finalizimin e marrëveshjes, FIFA po bashkëpunon me bankën amerikane “JPMorgan” dhe me Greg Maffein, ish-drejtorin ekzekutiv të grupit të argëtimit, “Liberty Media”.
Kjo nuk është hera e parë që Infantino përpiqet të tërheqë kapital privat në FIFA. Në vitin 2019, ai arriti një marrëveshje me bankën japoneze “SoftBank” për financim prej 25 miliardë dollarësh për një version të ri të Kupës së Botës për Klube, por projekti nuk u realizua.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje