.png)
Gazeta Si – Pas humbjes në finalen e Kupës së Botës në vitin 2014 dhe në finalet e Copa América në vitet 2015 e 2016, sulmuesi Lionel Messi u përball me kritika të ashpra dhe vendosi të mos luante më për Argjentinën.
Megjithatë, në realitet, Messi nuk u tërhoq kurrë përfundimisht nga kombëtarja dhe sot – dhjetë vjet më vonë – ai mbetet lojtari më i rëndësishëm i kombëtares.
Duke dhënë dy asiste dhe duke ndihmuar në fitoren 2–1 ndaj Anglisë, Messi dhe Argjentina janë kualifikuar për në finalen e Kupës së Botës, ku do të synojnë ta fitojnë sërish titullin, pasi ia dolën mbanë më parë në vitin 2022.
Le të kthehemi te ajo humbje e dytë radhazi në finalen e Copa América, më 27 qershor 2016. Menjëherë pas gjuajtjes së penaltive kundër Kilit, Messi (i cili kishte humbur penaltinë e tij) qëndroi i palëvizshëm në fushë, ndërsa lojtarët kilianë festonin fitoren.
Pas ndeshjes, ai tha: “Mendoj se kjo [largimi nga kombëtarja] është zgjidhja më e mirë për të gjithë. Para së gjithash për mua, e më pas për të gjithë të tjerët. Bëhen katër finale; thjesht nuk qenka e thënë për mua”.
Në atë moment të karrierës së tij, Messi kishte humbur katër nga katër finale me Argjentinën: tri finale të Copa América (2007, 2015, 2016) dhe një finale të Kupës së Botës (2014).
Deri në vitin 2016, në moshën 29-vjeçare, Messi ishte tashmë një nga futbollistët më të mëdhenj të të gjitha kohërave.
Duke luajtur për Barcelonën, ai kishte fituar tetë tituj të ligës spanjolle, katër trofe të Ligës së Kampionëve dhe pesë “Topa të Artë” – çmimi individual më prestigjioz në futboll.
Megjithatë, me Argjentinën nuk kishte fituar asgjë. Në fakt, ai etiketohej si dikush që “dështonte gjithmonë” në turnetë e mëdhenj.
Messi saying that he is quitting the Argentinian national team. pic.twitter.com/WxOmIGi9W7
— Ivana (@GloriousMadrid) June 27, 2016
Ishte gjatë “Copa América” të vitit 2016 – një edicion special i organizuar për të festuar njëqindvjetorin e turneut – që ai u bë golashënuesi më i mirë i të gjitha kohërave për kombëtaren argjentinase.
Megjithatë, dështimet e tij me kombëtaren u kthyen në meme – objekt talljeje dhe një mënyrë për të zhvlerësuar aftësitë e tij.
Pavarësisht se kishte bashkëlojtarë të talentuar (si Gonzalo Higuaín, Sergio Agüero, Ángel Di María dhe Javier Mascherano), Messi nuk arrinte ta përsëriste formën e tij të Barcelonës kur luante për Argjentinën.
Situata u rëndua edhe më shumë nga fakti se, në vitin 2016, rivali i tij Cristiano Ronaldo fitoi Kampionatin Evropian me Portugalinë.
Narrativa – shpesh e ekzagjeruar – ishte pak a shumë kjo: pa bashkëlojtarët e tij të jashtëzakonshëm të Barcelonës, Messi ndihet i humbur; atij i mungon karizma dhe bëhet pothuajse një barrë për ata që luajnë përkrah tij. Në të kundërt, Cristiano Ronaldo arrin t’i çojë bashkëlojtarët drejt suksesit në çdo situatë.
Dukej se Messi mund të tërhiqej nga futbolli brenda pak vitesh. Ai tashmë kishte pasur një karrierë të shkëlqyer (453 gola në 531 ndeshje – shifra pothuajse të paimagjinueshme para kohës së tij), ishte dënuar për mashtrim tatimor së bashku me të atin dhe kishte një marrëdhënie të tensionuar me federatën argjentinase; madje kishte filluar të diskutonte se me cilin klub mund ta mbyllte karrierën.
Për më tepër, largimi nga kombëtarja është një veprim i zakonshëm për futbollistët në vitet e fundit të karrierës së tyre.
Ai u përball me kritika të forta, përfshirë ato në vendlindjen e tij, Argjentinë, ku mbahej përgjegjës për humbjet e ekipit.
Opinioni publik ishte i ndarë “mes nevojës për të gjetur një kokë turku për më shumë se njëzet vite dështimesh dhe frikës se mos mbeteshin papritur pa Leon”.
Megjithatë, kur ai njoftoi tërheqjen nga kombëtarja, iu kërkua ta rishqyrtonte vendimin; në Buenos Aires u organizuan tubime masive.
Mauricio Macri, presidenti i vendit në atë kohë, madje e quajti atë “një dhuratë nga Zoti” në përpjekje për ta bindur të kthehej.
Në realitet, Messi nuk u tërhoq kurrë përfundimisht nga kombëtarja. Vetëm pak ditë pas finales së dytë kundër Kilit, ai tha se kishte ndryshuar mendje, duke deklaruar se e donte Argjentinën “tepër shumë”.
Ai gjithashtu ndryshoi stilin e flokëve, duke i lyer bionde, sepse kishte nevojë të “fillonte nga e para. Ishte një kohë konfuzioni të madh”.
Messi u rikthye në fushë për ndeshjen e radhës së Argjentinës pas humbjes në finalen e Copa América 2016.
Ishte një ndeshje kualifikuese për Kupën e Botës 2018 kundër Uruguait – një turne për të cilin Argjentina e siguroi kualifikimin vetëm në ndeshjen e fundit.
Ata e fituan atë ndeshje në Quito të Ekuadorit me rezultatin 3–1, falë një “hat-trick”-u të Messit. Megjithatë, në Kupën e Botës 2018, ata u eliminuan në fazën e 1/8-ave nga Franca, e cila më pas shpallet kampione, në një ndeshje emocionuese që përfundoi 4–3.
Në atë moment, historia e Messit në Kupën e Botës dukej vërtet e përfunduar. Ai kishte luajtur tashmë në katër turne – ku Argjentina gjithmonë dështonte për një arsye apo një tjetër – dhe ishte 31 vjeç.
Marrëdhënia e tij me ato katër Kupa të Botës të para nuk kishte qenë e lumtur. Në edicionin e vitit 2010 – nën drejtimin e Diego Armando Maradonës, lojtarit të dashur argjentinas me të cilin Mesi ende krahasohet shpesh – ai vendosi një rekord për numrin më të madh të goditjeve (29) pa shënuar asnjë gol.
Pak para Kupës së Botës të vitit 2014, ku ai do ta çonte Argjentinën në finale me një paraqitje të shkëlqyer, flitej shumë për faktin se si Mesi villte pak para ose gjatë ndeshjeve për shkak të tensionit.
Pas një tjetër humbjeje në Copa América në vitin 2019 – ku u mundën nga Brazili në gjysmëfinale – ai më në fund arriti të fitonte një trofe që i kishte munguar Argjentinës për 28 vjet.
Bëhej fjalë për Copa América 2021, një turne i luajtur në Brazil me dyer të mbyllura (për shkak të pandemisë) – dy faktorë që ndoshta lehtësuan presionin mbi Mesin, i cili kontribuoi me një gol ose asistim në 9 nga 12 golat e Argjentinës.
Kontributi i Lionel Scalonit ishte gjithashtu vendimtar; pasi mori drejtimin e Argjentinës pas Kupës së Botës 2018, ai solli rregull taktik dhe ndërtoi një skuadër të bashkuar rreth Mesit.
🇦🇷 Lionel Messi’s 2026 World Cup is now better than his 2022 World Cup 😳
— Sholy Nation Sports (@Sholynationsp) July 15, 2026
📊 2022 World Cup:
👕 7 games
⚽️ 7 goals
🎯 3 assists
😮 21 chances created
😳 7 big chances created
💨 15 successful dribbles
📊 2026 World Cup:
👕 7 games
⚽️ 8 goals
🎯 4 assists
😮 26 chances created… pic.twitter.com/E0Rx9zW7Dw
Që nga ai moment, Messi nuk pushoi kurrë së fituari me Argjentinën – pikërisht kur mund të pritej me arsye që karriera e tij të vinte drejt fundit, apo edhe të parashikohej tërheqja e tij pas atij trofeu të parë me Albiceleste-n.
Përkundrazi, Mesi vazhdoi të fitonte dhe të dominonte, duke luajtur lojën e tij unike dhe duke u bërë gjithnjë e më shumë lideri karizmatik – si dhe ai teknik – i kombëtares.
Në vitin 2022, ai fitoi Kupën e Botës për herë të parë, duke shënuar në çdo ndeshje të fazës me eliminim direkt; në vitin 2024, ai fitoi Copa América për herë të dytë; dhe ai është ende këtu: të dielën, më 19 korrik, në orën 21:00, ai do të luajë në finalen e tij të tretë të Kupës së Botës – duke u bërë lojtari i parë në histori që e arrin këtë.
Në moshën 39-vjeçare, ai u bë lojtari më i vjetër – që nuk luan si portier – që ka marrë pjesë në një gjysmëfinale të Kupës së Botës (kundër Anglisë).
Në dy edicionet e fundit të turneut, Messi ka regjistruar gjithsej 15 gola dhe 7 asiste. Ai ka qenë lojtari më i rëndësishëm dhe vendimtar i Argjentinës – dhe shpeshherë lojtari më i mirë në përgjithësi.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje