.png)
Gjykata e Lartë ka vendosur të mos pranojë rekursin e paraqitur nga Belinda Balluku, duke lënë në fuqi masën e pezullimit nga ushtrimi i funksioneve të saj.
Me këtë vendim, trupa gjyqësore nuk ka ndryshuar vendimet e mëparshme të gjykatave më të ulëta, duke konfirmuar vazhdimin e masës së pezullimit ndaj ish-zëvendëskryeministres.
Balluku kishte kërkuar rikthimin në detyrë përmes rekursit në Gjykatën e Lartë, duke kundërshtuar masën e vendosur në kuadër të një çështjeje penale ku ajo është marrë e pandehur për shkelje të dyshuara në procedurat e tenderimit.
Ajo është nën hetim nga Prokuroria e Posaçme (SPAK) për çështjen e tenderit të Tunelit të Llogarasë dhe për hetimet që lidhen me 7 lotet e Unazës së Madhe. Për të është vendosur gjithashtu ndalimi i daljes jashtë vendit.
Në muajin prill, SPAK zgjati me tre muaj afatin e hetimeve ndaj Ballukut.
Ndërkohë, Kuvendi i Shqipërisë më herët rrëzoi kërkesën e SPAK për autorizimin e arrestimit të deputetes. Në seancën plenare të 12 marsit, 82 deputetë votuan kundër kërkesës, ndërsa 47 votuan pro.
Vendimi i Kuvendit u shoqërua me debate të forta politike. Opozita kërkoi që t’i jepej rrugë kërkesës së SPAK, duke argumentuar se imuniteti parlamentar nuk duhet të pengojë hetimet e drejtësisë.
Nga ana tjetër, shumica parlamentare argumentoi se situata juridike kishte ndryshuar pas largimit të Ballukut nga funksionet ekzekutive dhe se masa e kërkuar nga SPAK nuk kishte më të njëjtin efekt.
Vendimi i Gjykatës së Lartë lë në fuqi pezullimin e Ballukut nga funksionet, ndërsa hetimet ndaj saj nga SPAK vijojnë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje