.png)
Gazeta Si – Një person u arrestua dhe 4 janë shpallur në kërkim për sulmin ndaj Komisariatit numër 3 në Tiranë para pak ditësh.
Policia njofton po ashtu se shtatë të tjerë janë vendosur nën hetim në gjendje të lirë.
Veprat për të cilat akuzohen personat e arrestuar apo proceduar penalisht janë “Thirrje publike për veprime të dhunshme”, “Shkatërrimi i pronës”, “Goditja për shkak të detyrës”, “Kundërshtim i punonjësit të policisë”, “Mosbindja ndaj urdhrit të ligjshëm të policisë”, “Prishja e rendit dhe e qetësisë publike”, “Organizimi e pjesëmarrja në grumbullimin e manifestime të paligjshme” dhe “Pengimi i qarkullimit të mjeteve të transportit”.
Sulmi i së shtunës ndodhi pas rreth dy orësh protestë para kryeministrisë, ata iu drejtuan komisariatit në rrugën “Mine Peza”, ku mbaheshin 21 protestuesit e arrestuar. Disa prej tyre ishin me maska, ashtu siç u shfaqën edhe gjatë protestës.
Më pas, me gurë e shkopinj thyen xhamat e komisariatit dhe shqyen derën duke hyrë deri në dhomën e pritjes.
Policia krijoi menjëherë një kordon sigurie në përgjigje të aktit të dhunshëm dhe përdori ujë për t’i shpërndarë. Megjithatë, ata u ulën përpara kordonit duke vijuar me thirrjet për lirimin e 21 protestuesve.
Për këta të fundit, të dielën gjykata vendosi që 12 prej tyre të liheshin me detyrim paraqitjeje, 2 në arrest shtëpie dhe 5 pa masë sigurie.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje