.png)
Nga Gazeta ‘Si’- Teksa puna e Këshillit të Lartë të Prokurorisë kaloi nën ‘lupën’ e komisionit ‘Xhafaj’, kritikat u nënvizuan fort nga kryetari i tij.
Për Fatmir Xhafajn, KLP mbetet një nga sistemet “më të dobëta” të drejtësisë, pavarësisht përmirësimit.
“Në vlerësimin tim, në punën e KLP ka disa hapa pozitivë, por KLP mbetet një nga sistemet më të dobëta të drejtësisë në Shqipëri. Shumë çështje që lidhen me sistemin e prokurorisë gjenerojnë nga vendimmarrje të diskutueshme të KLP. Në krahasim me vitet e tjera ka përmirësim, por krahasuar me çfarë i ka dhënë ligji, krahasuar me pritshmëritë e BE, ka shumë për të bërë”, tha Xhafaj.
Vakancat, të përmendura nga kryetarja e KLP, Mirela Bogdanin, si “shumë të larta”, ishin një tjetër pikë kritike për Xhafajn.
“Keni qenë të paaftë të bëni llogari të kësaj natyre apo ka një lloj papërgjegjshmërie? Vitin e kaluar i keni kërkuar Shkollës së Magjistraturës vetëm 12 prokurorë. Nuk ka një numër zyrtar. Edhe për plotësimin e vakancave kërkoni 12 prokurorë, ku kishit mundësinë për më shumë, ju vetë, ndërkohë që keni mbi 100 vakanca, keni disa vakanca të fshehura, unë kam vite që e trajtoj këtë gjë. Nuk kërkoni shtim të prokurorëve përmes Shkollës së magjistraturës, as shtim të numrit të përgjithshëm. Si do ta zgjidhim? Kur do të kemi një plotësim të plotë të vakancave sipas numrit aktual të prokurorëve dhe vakancave efektive?”, iu drejtua ai Bogdanit.
Kjo e fundit i tha se ka parashtruar të njëjtin problem, por institucioni ka kërkuar cilësi dhe jo sasi.
“Arsyeja që u parashtrua ishte cilësia e numrit të kandidatëve”, u shpreh Bogdani.
Trajnimi i kapaciteteve mbështetëse në Këshill s’duhet të jetë hapësirë “qokash”, vijoi Xhafaj.
“Keni nevojë për shtesa? Jo për të bërë qokë, për të marrë shokët e miqtë, burrat, gratë, fëmijët e prokurorëve, gjyqtarëve apo politikanëve? Ju dhe disa institucione të tjera, e keni bërë si vend ku bashkohen fëmijët e prokurorëve dhe gjyqtarëve”, u shpreh kryetari i komisionit.
Për këtë pikë, trajnimi sigurohet nga ASPA ose në pamundësi nga donatorët, tha Bogdani, teksa sugjeroi trajnim paraprak apo ndërmjet mandatit për të gjithë anëtarët, lidhur me funksionimin e organeve kolegjiale.
Pyetjes lidhur me emërimin e kreut të Byrosë Kombëtare të Hetimit, Bogdani iu përgjigj se është një proces që kërkon kohë.
“Ende s’kemi bërë ndonjë përpjekje duke qenë se sapo u përmbyll përzgjedhja. Nuk është i rëndësishëm vetëm emërimi, por edhe ndërveprimi për të reflektuar standarde ndërkombëtare, do të marrë pak kohë”, tha Bogdani.
Lidhur me debatet brenda institucionit dhe reflektimin e etikës në publik, Bogdani kërkoi ndjesë duke arsyetuar se institucionet kolegjiale e kanë të natyrshëm konfliktin, por janë marrë masa.
“Masat për dialogun ndërinstitucional, kërkojmë ndjesë për tonet shpeshherë të ngritura të debatev, në institucionet kolegjiale lind natyrshëm një lloj konflikti, për të mos folur pastaj për qasjet. Ne kemi shpeshherë përballje të forta lidhur me të njëjtin koncept për mënyrën si duhet adresuar. Kemi marrë masa dhe besoj që nëse nuk arrijmë të kemi dakordësi ose zgjidhje të përshtatshme, do të miratojmë rregulla etike”, tha ajo.
Digjitalizimi, një pikë që sipas Xhafajt ndikon negativisht vlerësimin, është një proces për të cilin Bogdani u përgjigj se i takon Prokurorit të Përgjithshëm, ndërsa pritet të përfundojë për një vit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje